Раздвижено низ улиците и редици пред маркетите, е сликата од Куманово откако утрово заврши 56-часовниот полициски час во овој град.
Дел од кумановци утрово тргнаа кон своите работни места, дел се упатија да пазарат. Пред некои продавници може да се забележат и подолги редици, а пред поголемите маркети има и по еден полицаец. Жителите, пак, се чини, ги почитуваат препораките и држат растојание од по еден метар.
Жителите на овој град имаат уште 5 часа слобода на движење бидејќи од денеска полицискиот час во Куманово ќе почнува во 16 часот.
Изминатиот викенд, пак, полицискиот час започна во 21 часот во петокот, а заврши утрово во 5 часот.
Ваквите поригорозни мерки се воведоа откако во Куманово беа откриени поголем број случаи на заразени со коронавирус.
Досега на територијата на Општина Куманово беа регистрирани 114 заразени со ковид-19.
