Да не дозволиме профитот на поединци да надвладее над јавниот интерес за квалитетен, здрав и хуман живот на граѓаните, вели пратеничката Морачанин
По информациите дека на парцелата кај хотелот „Холидеј ин“, сепак, ќе се реализира изградбата на висококатници, претседателката на владејачката ДОМ и пратеничка Маја Морачанин денеска, во изјава што ја даде на оваа локација, побара сите надлежни институции да го сопрат бетонирањето на, како што рече, последниот слободен простор во срцето на градот Скопје.
„Волјата на граѓаните мора да биде испочитувана! Да не дозволиме профитот на поединци да надвладее над јавниот интерес за квалитетен, здрав и хуман живот на граѓаните“,
вели Морачанин.
ДОМ, исто така, бара проектот да биде транспарентно прикажан на граѓаните, за сите да знаат што точно се планира; да се почитува Законот за урбанистичко планирање, според кој ДУП мора да биде усогласен со ГУП и да се испита дали се почитува Законот за урбано зеленило, односно за минимум 20% зеленило на градежна парцела.