Нашата последна посета на локацијата деновиве покажа дека градбата продолжува и покрај решението за стопирање
Од Општина Гази Баба велат дека се подготвени да му издадат решение за уривање на градбата на инвеститорот Исни Адеми, но морале да почекаат бидејќи тој поднел жалба до Државната комисија за одлучување во втор степен во областа на инспекцискиот надзор и прекршочната постапка
Помина еден месец откако „360 степени“ првпат извести дека зад Поликлиниката Ченто никнува дивоградба. Нелегалниот објект се гради на државно земјиште на кое порано имало привремени објекти, бараки, кои некако се трансформирани во приватна сопственост.
На средината на јуни, кога повторно ја посетивме локацијата, на столбовите веќе беше поставена бетонска плоча. Тогаш од Општина Газа Баба првпат ни потврдија дека се гради без дозвола и дека издале решение за стопирање на градбата.
Нашата последна посета на локацијата деновиве покажува дека градбата продолжува и покрај решението за стопирање. Првиот дел од објектот полека добива и ѕидови и прозорци. И претходно и сега, на самото градилиште нема информативна табла кој и што гради. Такво нешто, впрочем, и не е логично да има, бидејќи според важечкиот детален урбанистички план, таму треба да има јавни површини – паркинг, улица и тротоар.
Приказната ја отворија локалните жители кои, за разлика од пред еден месец, сега се плашат да зборуваат јавно. Во меѓувреме, освен до општината, реагирале и до неколку други институции.
И „360 степени“ се обрати до една од нив – Државниот инспекторат за градежништво и урбанизам, од каде ни потврдија дека го разгледале дописот од жители на Гази Баба, но велат – не биле надлежни.
„Утврдено е дека претставката се однесува за работи од локално значење, односно посочената локација се однесува за градба од втора категорија, за која, согласно одредбите од Законот за градење, во управна постапка има одлучувано Општината и има донесено соодветни управни акти. Во однос на прашањето какви понатамошни дејствија би биле преземени, ве упатуваме до градоначалникот на Општина Гази Баба, кој е надлежен да постапува за градбите од локално значење“,
велат од Државниот инспекторат за градежништво и урбанизам.
Се обративме и до Гази Баба, по трет пат за еден месец. Локалната власт досега тврдеше дека уште во јануари, со полициска асистенција, ја отстраниле лимената ограда со која бил заграден просторот. А во мај, откако градбата продолжила, донеле решение за прекин на градбата.
Сега велат дека се подготвени да му издадат решение за уривање на градбата на инвеститорот Исни Адеми. Но, морале да почекаат, бидејќи тој поднел жалба до Државната комисија за одлучување во втор степен во областа на инспекцискиот надзор и прекршочната постапка. Оттаму, пак, велат дека рокот за постапување по жалбата изнесува два месеци.
„Доколку врз основа на утврдената фактичка состојба и изведените докази по предметот, произлезе дека жалбата треба да се одбие, во тој случај може да се поведе управен спор со тужба пред Управен суд Скопје во рок од 30 дена од денот на доставување на второстепеното решение“,
ни одговорија од Државната комисија за одлучување во втор степен.
Со други зборови, сите знаат дека се гради без дозвола и тоа на државна земја, но централните и локалните институции не можат или не сакаат да ја спречат градбата. Како е можно еден човек да е над законот?
Според податоците на Државниот завод за статистика, случајот не е единствен. Само лани во земјава се регистрирани 685 дивоградби. Таа бројка е изненадувачки мала, вели претседателот на Асоцијацијата на архитекти, Мишко Ралев.
„Сметаме сите од струката дека таа бројка е поголема. Но, инертноста или неекипираноста на општините, имаме општини со многу различна администрација, инспекциски служби, сведочевме дека се жалеше градоначалникот на еден Охрид дека имал само еден градежен инспектор што е нон сенс“.
– Тоа се случува и во неколку скопски општини…
„Да, велам за Охрид, бидејќи тој има некаков посебен третман и мислиме дека Охрид под некоја специјална опсервација на јавноста на општеството. Но, случајот не е таков и вие со една таква оскуден кадар во инспекциските служби не можете да го контролирате земјиштето и просторот а со тоа се поттикнуваат токму овие бесправни градби“,
вели претседателот на Асоцијацијата на архитекти, Мишко Ралев.
Според Ралев и самата држава, индиректно, ги стимулира дивоградбите. На пример, преку најавите за широк закон за легализација на дивоградби, преку неносење на Детални планови, но и со неменувањето на одредбата за дооформување парцела, според која е доволно да се поседува 30% од некоја парцела за да се добие право да се откупат останатите 70% од државата по ценовник кој не одговара на пазарните цени во атрактивните општини.
„Тоа е еден логичен заклучок дека ако државата заради окрупнување на локациите го продава не по пазарна цена своето земјиште, тоа е доказ дека недомаќински се третира просторот. А просторот е на сите, ние мораме да сфатиме дека тоа е наш простор и од нашите средства се одзема. ,
вели Ралев.
Кој и да ги стимулира дивоградбите, на сила се закони што треба да ги спречат. Тие важат на целата територија на земјата, па така треба и да се применуваат. Примерот од Гази Баба не само што покажува дека не е така, туку е слика и прилика за целосно потфрлање на системот.