Извори од МВР велат дека на локацијата полицајците го легитимирале лицето Агрон Халими, сопруг на градоналачничката на Арачиново, Меликие Халими. Во телефонски разговор со „360 степени“, Халими негира дека гради на посочената локација и вели дека неговото име никаде не фигурира како инвеститор на градба
„360 степени“ почна да се интересира за случајот во саботата. Вчера веќе ја немаше бетонската плоча, а денеска беа отстранети и столбовите од спорната градба
Во Скопје се гради на секој чекор. Но, не секаде е по пропис. Еден куриозитет, пред очите на сите, се случува на улицата „Ферид Бајрам“ 48 во скопски Бутел. Пред зграда на таа адреса, на паркингот, во неколку наврати некој се обидува да го „присвои“ просторот и да гради во продолжение на дел од станбениот објект. Не само што намената на спорната парцела 551/2 е за зеленило, според деталниот урбанистички план, туку и земјиштето е државно.
Адвокатот на еден од засегнатите сопственици на имот во станбената зграда, Еленко Миланов, вели дека обидот да се гради трае од 2019 година со тргни-застани динамика. Последен пат работници на терен се забележани во саботата, по празникот Рамазан бајрам.
„За започнатите градежни работи поднесена е пријава до градежниот инспекторат во Општина Бутел, која датира од пред подолго време. Но, откако почнаа повторно да се изведуваат градежни работи, интервенирано е и пуштено известување за продолжување на градежните работи и до инспекторатот во Општина Бутел, но и до Државниот инспекторат за градежништво и урбанизам, со барање истите да интервенираат и со оваа нелегална градба да се запре“,
вели адвокатот Миланов.
Појавувањето на камерата на „360 степени“ како да ја смени целата приказна која трае повеќе од две години, и тоа за само три дена.
Во саботата ги регистриравме градежните активности на парцелата за која со увид во податоците од катастарот утврдивме дека навистина е во државна сопственост. Неколкумина мајстори работеа на изградба на бетонската плоча, откако веќе ги изградиле столбовите. Ја немаше задолжителната табла на која треба да пишува – кој, што гради и според кое одобрение за градба.
При претходната пријава до МВР, полицијата легитимирала едно лице присутно на терен, но засега не е утврдено дали тој е „инвеститорот“.
„При излегување на припадници од МВР, има лице кое се претставило, но дали е тоа кое навистина гради или не, не би сакале да навлегуваме и никого да клеветиме. Но, за сето тоа постои документација и одговорот може да го побарате во МВР како надлежно за тој простор“,
изјави Миланов.
Од Министерството за внатрешни работи потврдија дека имале интервенција по пријава при крајот на минатата година и дека било легитимирано едно лице. Неофицијално, извори од МВР велат дека полицајците од СВР Чаир го легитимирале лицето Агрон Халими, во јавноста познат како сопруг на градоначалничката на Арачиново, Меликие Халими. Во телефонски разговор со „360 степени“, Халими негира дека гради на посочената локација и вели дека неговото име никаде не фигурира како инвеститор на градба. Кој точно гради, прашавме и во Општина Бутел. Но, и градоначалникот Велимир Смилевски тврди дека не знае. Иако, додава, не е првпат да има обид да се постави бетонска конструкција на оваа локација.
„Нешто слично вака се случи на истото место и пред една година. Општинскиот инспекторат излезе, утврди дека е дивоградба, но, сопствениците или тие што го градеа го разрушија делот. Еве, сега и од вас дознав во саботата, излегов на самото место, видов дека е повторно продолжено да се гради таму. Јас можам само да зборувам со факти. Сопственик на објектите каде што се гради е некоја извесна госпоѓа Ана, а кој е инвеститор, која е градежна фирма, тоа не можам да ви го кажам, бидејќи немам такви информации“,
вели за „360 степени“ Смилевски.
Иако инспекциите не работеа, „360 степени“ се врати на локацијата и во неделата. На наше изненадување, не само што мајсторите не ја завршиле бетонската плоча што ја правеа претходниот ден туку го отстраниле и тоа што го изградиле. Останати беа само бетонските столбови.
Денеска, пак, два дена откако почнавме да се распрашуваме, на терен веќе ги нема и бетонските столбови. Некој ги урнал. Па, кога градежниот инспектор од Општина Бутел излегол на терен, утврдил дека нема основа за поведување постапка.