Во последните неколку недели и претседателот на ВМРО-ДПМНЕ Христијан Мицкоски и потпретседателот Александар Николовски „пропуштија“ да ја бранат Данела Арсовска на јавна сцена. Не се идеални односите и на релација градоначалник – Совет на Град Скопје. Дали е на повидок дистанцирање меѓу двете страни?
На 20 април годинава Советот на Град Скопје ја одржуваше деветтата седница. При крајот, дојде ред да се закаже и седница за советнички прашања. Тие сесии, вообичаено, се најдобра шанса советниците да побараат и да добијат одговор од градоначалникот.
„Предложивме два термини до Кабинетот на градоначалник, се надевам ќе добиеме одговор. Четвртоците се 5 и 12 мај“,
вели претседателот на Советот, Трајко Славески.
Претседателот на Советот на Скопје кој ги предложи термините, Трајко Славески, е кадар на ВМРО-ДПМНЕ. Терминот за одржување на седницата за советнички прашања падна на 11 мај, бидејќи следниот ден, на 12-ти, градоначалничката Данела Арсовска требало да патува надвор од Скопје.
Но, и на договорениот датум, Арсовска не дојде. Не само што опозицијата не доби шанса да поставува прашања, туку и претседателот на Советот, кој доаѓа од партијата што застана зад нејзината кандидатура за градоначалник, беше ставен во непријатна позиција.
– Градоначалничката не е тука. Дали имате информација дека градоначалничката ќе дојде или нема да дојде тоа сакав да знам? – праша Јанчева.
– Госпоѓата градоначалник е уредно поканета, немам информација дека нема да дојде, ја очекуваме, одговори Славески.
Опозицијата, на крај, ја напушти седницата, а на јавна сцена се засили впечатокот дека комуникацијата и односите меѓу ВМРО-ДПМНЕ и градоначалничката Арсовска, не се на завидно ниво.
За „360 степени“, Арсовска вели дека советниците требало да знаат дека на закажаниот датум била на судско рочиште, за тужбата што ја покрена против портпаролот на СДСМ, Дарко Каевски.
„И самите советници верувам дека имаат информација и го знаат тоа однапред. Не можев да присуствувам, бидејќи законски бев задолжена да бидам на друго место, односно имав судско рочиште. Од таа причина, во моја замена беа тука претставниците на Градот и претставниците на јавните претпријатија, на установите и директорите на училиштата, кои, практично, имаа потреба односно обврска на тој ден да ги одговараат советничките прашања“,
вели Данела Арсовска, градоначалничката на Скопје.
„360 степени“ разговараше и со Трајко Славески – човекот кој требаше, но немаше информација зошто ја нема градоначалничката на седницата што тој ја закажа. Неколку дена по настанот рече дека не требало да се прави проблем од неприсуството на градоначалничката, бидејќи и така многу одговори се барале во писмена форма.
„Мислам дека 90 насто од нив, кога ќе излезат на говорница, без оглед дали се од позиција или опозиција, бараат на писмено да ги добијат одговорите. Така што, мислам дека не треба да се направи проблем од неприсуството на градоначалникот Арсовска. Можеше да се добијат директно одговори на седницата, а секако имаме голем број прашања за кои одговорите се во подготовка“,
вели Славески.
Иако Славески јавно не беше критичен кон Арсовска за конкретното прашање, неколку неодамнешни настапи на негови сопартијци креираа перцепција дека ВМРО-ДПМНЕ се дистанцира од градоначалничката на Скопје.
Во гостувањето во „360 степени“, потпретседателот на ВМРО-ДПМНЕ, Александар Николоски, доби прашање за најавата на неговата партијата дека ќе го блокира Собранието, во контекст на слично сценарио во Град Скопје. Не одговори дека тоа би било беспредметно.
– Може ли СДСМ и ДУИ сега да кажат да речеме – го блокираме Советот на Град Скопје затоа што Данела Арсовска е катастрофа за Скопје?
„Тоа е легитимно право на една опозиција, во моментов се тие опозиција. Разликата помеѓу локалната самоуправа и централната власта е што во локалната самоуправа нема можност за предвремени избори за градоначалник, освен не дај Боже ако има…“, одговори Николовски.
– Сам се повлече или нешто друго се случи.
И лидерот на ВМРО-ДПМНЕ, Христијан Мицкоски, кој неодамна гостуваше на „Топ тема“, одлучи да не ја брани Арсовска кога почна да добива критички прашања за нејзиното досегашно работење.
– И верувате дека Данела Арсовска не ви губи гласови, со нејзиното по мене неработење?
– Данела Арсовска е кандидат која дојде како независен а ВМРО-ДПМНЕ ја поддржа во рамите на кампањата, како што ја поддржаа и други политички партии. Се натпреваруваше со бројчето 82. Точно сме ја поддржале немам дилема, и се ќе сториме да направиме нешто за Скопје и скопјани да имаат подобар живот“, одговори Мицкоски.
– Меѓутоа, да не цитирам нема 250 нови автобуси, го бара Ќосето назад, дека нема одржано прес конференција, не е транспарентна, излегува само на еден портал.
– Тоа со Данела ќе си ја викнете на емисија, ќе ви даде одговор, возврати Мицкоски.
– Ама ако сте и дале поддршка, очекувате за возврат нешто да направи.
– Не можам јас да одговорам за нејзе зошто не одржала прес конференција или тоа што вие велите не била транспарентна и слично. Треба да си упатувате прашања до Данела Арсовска, одговори Мицкоски.
– Ние упатуваме, не одговара.
-Јас можам за ВМРО да ви кажам и за мене секогаш сум бил на располагање, рече лидерот на ВМРО-ДПМНЕ.
Дури и Славески, кој вели дека нема причина да не е задоволен од работата на Арсовска, за „360 степени“ прифаќа дека градоначалничката треба да е потранспарентна.
„Мислам дека треба малку да поработи повеќе на претставување на своето работење во јавноста. Се согласувам дека перцепцијата е многу битна и некогаш може да пропуштате нешто што јавноста го сфаќа вака или онака“,
смета Славески.
Критики доаѓаат и од новинарската заедница – за отсуство на прес-конференции на кои би можеле лично да постават прашања. Во петокот, на пример, градоначалничката го прослави празникот на пожарникарите без медиуми, спротивно на досегашната пракса. А дека немаат пристап до информации, не само поради пропаднатата седница за советнички прашања, се жалат и од најголемата опозициска партија во градскиот Совет.
„Нашите одговори, најчесто, ги бараме во усна форма за да ги слушнат и граѓаните, бидејќи некој од нив може и не прати. На писмено поставените прашања добиваме делумни одговори, а на некои прашања и не добиваме одговори. Од 10 март до денес јас на едно советничко прашање упатено до градоначалничката се уште немам добиено одговор. А, тоа беше – кога ќе го реализирате вашето предизборно ветување да ги субвенционирате таксистите и приватните превозници за набавка на еко-автомобили“,
вели Јанчева.
Арсовска не ги прифаќа критиките. Не гледа потреба од постојано одржување прес-конференции за работи за кои смета дека не се доволно важни за јавноста.
„Напротив, сметам дека се она што било побарано од новинарите или оние работи кои биле поставени како прашања до Градот, а јас сум претставник на Градот, значи јас како личност не излегувам со свои лични изјави, туку ги претставувам оние проекти кои ги реализираме, во секоја една можност кога тоа било побарано од новинарите, сме одговарале на прашањата доследно, затоа што сакам јавноста да е информирана, а исто така секојдневно испраќаме по минимум 4-5 соопштенија за да бидат доследно сите информирани за она што се случува во Градот,
вели за „360 степени“ Арсовска.
Градоначалничката Арсовска вели и дека се смета за непартиски човек, до кого не допираат поединечни ставови изнесени во јавноста.
„Нема јас што да гледам и што да знам, она што го гледам е токму она како што ви кажав се транспонира кое што Советот тука го прави. Јас не сум политичка личност, ниту сум партиска личност, не сум била ниту имам таква некоја определба во овој момент. Така што, нема зошто да ме засегаат поединечни работи или мислења кои некој би сакал да ги нафрли во јавноста. Она што е важно за нас е компактноста што ја имаме од аспект на политиките што треба да се носат, а се во интерес на граѓаните и ги гледаме низ она што Советот ги носи на своите седници“,
вели Арсовска.
Ако говориме за дистанцирање во наводници, и јас тоа го правев во изборната кампања, вели Славески. Сепак, неговиот одговор не е во контекст на евентуално партиско дистанцирање од Арсовска, туку како контролор на нејзината работа.
„На секој митинг, во присуство на госпоѓата Арсовска, кажував, тоа може да го проверите, дека ние советниците ќе бидеме поддршка на градоначалникот, но и нејзина контрола. Ние не сме совет кој само дига рака без поставување прашања. Мислам дека сме во насока солидно да ја извршуваме својата функција. Фактот дека најголем дел од одлуките што ги носи Советот се и со гласови на опозицијата, бидејќи тука нема многу политика, сепак, мислам дека Советот во оваа 11 седница работи ефикасно и во интерес на граѓаните на Скопје“,
вели Славески.
За разлика од Славески, опозицијата во Советот нема причина да избира зборови на оваа тема. Според советничката Љубица Јанчева, постои одредено дистанцирање меѓу Арсовска и партијата што ја поддржа на локалните избори.
„Од тука не е чудно во догледно време истите да се разидат. Да не комуницираат, што е неодговорно и од двете страни и од страна на ВМРО-ДПМНЕ и од страна на градоначалничката, а тоа е доказ за лошите кадровски понуди кои ги направила ВМРО-ДПМНЕ и тоа е доказ за едно лицемерие кое е една од карактеристиките на ВМРО-ДПМНЕ како политичка опција“,
е ставот на Јанчева.
Сепак, барем јавно, досега нема отворен судир на релација Арсвоска – ВМРО-ДПМНЕ кој неповратно би ги влошил односите. Ако тоа се случи, нема да биде првпат во главниот град. Иако не беше идентично сценарио, Трифун Костовски во 2005 година стана градоначалник на Скопје како независен кандидат и првично ја имаше поддршката од ВМРО-ДПМНЕ во Советот. Во 2009, кога заврши неговиот мандат, беа во отворена политичка војна.