Владимир Микиќ, епидемиолог од Институтот за јавно здравје во дебата на „360 Степени“ зборуваше за проекциите на епидемиолозите за пикот на новиот коронавирус, Ковид-19 во нашата држава. Министерот за здравство Венко Филипче веќе кажа дека пикот се очекува кон средината на април и дека се очекуваат околу 2.000 случаи
„Сите проценки се прават заеднички и на Комисијата за заразни болести и во Институтот за јавно здравје и во рамки на кризниот штаб во Владата. Проценките се такви, меѓутоа многу е неблагодарно да се каже – да, ќе биде максимум 2.000 или ќе биде 3.000 или ќе биде 1.500 или можеби ќе биде и повеќе. Зависи од повеќе фактори. Прво, од способноста да се тестираат сите случаи, во зависност од тоа колку тестови ќе се направат, второ се временските фактори – се уште се работи за нов вирус, треба да видиме како ќе се однесува во тек на потоплите месеци, очекуваме како другите респираторни вируси, барем дел да се успори трансмисијата што ќе ни даде време и со овие засилени мерки за социјално дистанцирање, да го успориме и спречиме понатамошното ширење. Меѓутоа, јас се уште сметам дека е рано. Она што можам да го кажам е дека се уште сме во почетните фази на епидемијата, очекуваме да се зголемува бројот, тоа го гледаме секаде во светот“,
рече Микиќ.
Тој се согласи дека почетокот во нашата земја е благ.
„Во моментов сме една од ретките земји кадешто се уште имаме добри мерки коишто даваат резултати, кадешто се уште имаме контролирано ширење на епидемијата и се уште капацитетите со коишто располагаме се спремни да ги прифатат пациентите. Прерано е да се каже дека сме одлични, дека нема да се случи зголемување на бројот бидејќи тоа не зависи само од мерките, туку апсолутно на сите нас како граѓани ни е одговорност да ги слушаме и да ги почитуваме препораките“,
рече Микиќ.
Тој рече дека освен социјално дистанцирање и одржување хигиена нема друго ефикасно решение.