Обвинителот во СЈО, Гаврил Бубевски, го повика Судскиот совет да постапи по иницијативата на Специјалното јавно обвинителство, цитирана и во извештајот на американскиот Стејт Департмент, со која се бара утврдување одговорност за претседателот на Врховниот суд, Јово Вангеловски.
„Ако оваа година не ја завршиме таа работа, догодина во извештајот (н.з. на Стејт Департментот) ќе бидеме ние, а не тие“, рече Бубевски.
Коментирајќи ја одлуката на Врховниот суд, со која на екс-министерката Гордана Јанкуловска и се одлага издржувањето на казната затвор за случајот „Тенк“, Бубевски рече дека бебето на Јанкуловска деновиве полни една година и дека е недозволиво и понатаму да се пролонгира издржувањето на казната.
„Сметам дека Законот за извршување на санкции е многу јасен и му дава можност на судот додека детето наполни 1 година, заради првата на детето и мајката, да го одложи извршувањето на санкцијата. Денеска истекува рокот, детето полни една година, се над тоа е нешто што е недозволиво. Не сум ја видел одлуката на Врховен од кои причини се раководел, дали хуман аспект или нешто друго имал предвид. Но, законот за извршување на санкции е така регулиран“, изјави обвинителот од СЈО, Бубевски.
Тој се согласи со новинарското прашање дека е симптоматично тоа што Врховен го одложува извршувањето на казната само кога се работи за високи функционери.