Лицата не ја почитувале дадената полициска наредба да го сопрат возилото, туку се дале во бегство, притоа оштетувајќи службено полициско возило, но набргу се запрени и лишени од слобода, велат од МВР
Полицијата спречи транспорт на дрога во вредност од 100 000 евра и приведе двајца дилери, соопштија од Министерството за внатрешни работи (МВР).
„На 24.03.2023 од страна на полициски службеници од Одделот за криминалистичка полиција – Сектор за недозволена трговија со дрога и опасни материи – Единица за недозволена трговија со дрога во содејство со Одделот за специјални полициски операции – САЕ ‘Тигар’, Оперативен тим за Потраги при СВР Скопје и СВР Тетово се лишени од слобода две лица од с. Арачиново, Скопско, при што е спречен транспорт на околу 35 килограми дрога“,
информираат од полицијата.
Имено, во утринските часови на наплатна станица Тетово, на автопатот Гостивар – Тетово, полициски службеници дале знак за запирање на патничко возило „ренџ ровер“, со скопски регистарски ознаки, управувано од К. А. (32), во кое сопатник бил О. А. (23), двајцата од с. Арачиново, Скопско.
„Лицата не ја почитувале дадената полициска наредба да го сопрат возилото, туку се дале во бегство, притоа оштетувајќи службено полициско возило, но набргу се запрени и лишени од слобода“,
се додава во соопштението на МВР.
Министерството за внатрешни работи изминатиот период спроведе неколку акции во кои беа приведени повеќе осомничени дилери, меѓу кои и двајца просветни работници, односно наставници во училишта во Скопје и во Прилеп.