360° со сторијата „Наместо на рециклирање, речиси половина од отпадот завршува на улици и депонии – што предвидуваат новите закони за негово управување?“ на новинарот Петар Клинчарски ја доби првата новинарска награда за одржлива енергија на Западен Балкан.
Ова е прва награда од ваков тип во регионот, а ја доделува Факултетот за напредни социјални студии во соработка со Факултетот за медиуми од Љубљана.
Втората награда ја доби српскиот новинар Владимир Спасиќ од БГЕН (Balkan Green Energy News), за сторија дека Србија го расчистила патот за соларна енергија во домаќинствата, додека третата награда заврши во рацете на Марија Дедиќ од порталот „Е-капија“ за сторија која исто така доаѓа од Србија и го обработува прашањето дали енергетската криза ќе ја забрза транзицијата на Србија кон обновливи извори на енергија.
Целта на доделувањето на оваа награда е да им се оддаде признание на најдобрите новинарски дела на тема за одржливата енергија на Западен Балкан и да се придонесе оваа тема да биде препознаена како суштинска за градење подобра иднина во регионот. На конкурсот можеа да учествуваат стории објавени во периодот од 1 јануари 2020 до 30 септември 2022 година.
Наградената сторија на Петар Клинчарски беше објавена во октомври 2021 година, а во видеото во продолжение можете да ја погледнете во целост: