Пред да се најдат на пленарна седница, имињата на осумте нови пратеници беа утврдени на собраниската Комисија за деловнички и мандатно-имунитетни прашања која, пак, го усвои извештајот на Државната изборна комисија (ДИК) со предлогот на верификација на мандатот на избраните пратеници од листа на кандидати
Со 76 гласа „за“ и без ниеден „против“ или „воздржан“, пратениците на денешната пленарна седница ги верификуваа мандатите на осумте нови народни избраници кои доаѓаат на местата на премиерот Христијан Мицкоски и неколкутемина новоизбрани министри во Владата.
На местото на премиерот Христијан Мицкоски во Собранието доаѓа Драган Недељковиќ од коалицијата предводена од ВМРО-ДПМНЕ во изборната единица 1. Пратеничкото столче на Гордана Димитриеска-Кочоска, која сега е министерка за финансии, ќе го заземе Велика Стојкова-Серафимовска од коалицијата на ВМРО-ДПМНЕ, исто така во првата изборна единица.
Двајца нови пратеници од ИЕ 1 се и актуелниот претседател на Унијата на млади сили (УМС) на ВМРО-ДПМНЕ, Сергеј Попов и Фериде Хаџиу од коалицијата „Вреди“. Попов ќе дојде на местото на министерот без ресор Љупчо Димовски, а Хаџиу на местото на Изет Меџити кој сега е министер во животна средина.
На местото на министерот за одбрана и довчерашен пратеник Владо Мисајловски во Собранието доаѓа Дијана Илиевска од коалицијата предводена од ВМРО-ДПМНЕ во изборната единица 2, а министерот за односи меѓу заедниците Иван Стоиљковиќ ќе го менува Емилија Ангелова, исто така од втората изборна единица.
Весна Ѓорѓиева од коалицијата на ВМРО-ДПМНЕ во четвртата изборна единица е пратеничката која доаѓа на местото на министерот за транспорт и врски Александар Николоски.
На местото на министерот за социјална политика, демографија и млади, Фатмир Лимани, пак, доаѓа Каљтрина Хаџиу од коалицијата „Вреди“ во изборната единица 6.
Пред да се најдат на пленарна седница, имињата на осумте нови пратеници беа утврдени на собраниската Комисија за деловнички и мандатно-имунитетни прашања која, пак, го усвои извештајот на Државната изборна комисија (ДИК) со предлогот на верификација на мандатот на избраните пратеници од листа на кандидати.
„Предлогот на Комисијата за деловнички и мандатно-имунитетни прашања е усвоен и со тоа е извршена верификација на мандатите на пратениците. На сите пратеници им ја честитам верификацијата на мандатите и им посакувам успех во работата“,
рече потпретседателката на Собранието, Весна Бендевска, која заседаваше со денешната собраниска седница.