По примопредавањето на функцијата, експремиерот Талат Џафери, во објава на Фејсбук, напиша дека на Мицкоски му посакал успешна работа и изразил надеж за високо ниво на политичка свест и отвореност за соработка за стратегиските приоритети на државата
Новоизбраниот претседател на Владата, Христијан Мицкоски, утринава во владината зграда ја презеде премиерската функција од досегашниот технички премиер Талат Џафери.
По пристигнувањето, Мицкоски и Џафери одржале кратка средба во премиерскиот кабинет.
Настанот помина без изјави за медиумите.
По примопредавањето на функцијата, досегашниот премиер Талат Џафери, во објава на Фејсбук, напиша дека на новиот премиер му посакал успешна и ефикасна работа во интерес на сите граѓани. Посочил дека на државата ѝ се потребни квалитетни реформи, со цел унапредување на квалитетот на живот на граѓаните според европските демократски стандарди и вредности.
„Ги нагласивме слободните, фер и демократски избори како додадена вредност на евроинтеграциите. Искажав надеж дека политичките субјекти ќе покажат високо ниво на политичка свест и отвореност за соработка за стратешките приоритети на државата“,
пишува Џафери во објавата на Фејсбук.
Освен за премиерската, церемонии за примопредавање на функциите денеска ќе има и во министерствата меѓу актуелните министри во техничката влада и новоизбраните министри.
Новата влада, чиј претседател е Христијан Мицкоски, беше избрана синоќа во Собранието со 77 гласа „за“ и 22 „против“. Владината коалиција ја сочинуваат ВМРО-ДПМНЕ, коалицијата „Вреди“ и ЗНАМ.