Минатата година Венеција ја посетиле околу 20 милиони луѓе, а околу половина од нив престојувале во хотелите и апартманите во градот. Тоа значи дека бројот на туристички легла го надминал бројот на жители на Венеција, каде што според официјалните податоци живеат околу 49 илјади луѓе
Туристите што од денеска ќе ја посетат Венеција, ќе мора да платат туристичка такса. Градот Венеција воведува дневна такса од пет евра за туристите што ја посетуваат оваа туристичка дестинација, пренесува Асошиејтед прес.
Како што соопштиле тамошните градски власти, таксата се воведува со цел да се справат со масовниот туризам, по што е позната оваа дестинација. Билети за влез во градот ќе се наплаќаат главно за време на викендите во текот на пролетните и летните месеци, кога туризмот е во пораст.
Иако на влезот во градот нема поставено бариери со цел да се врши проверка дали сите туристи имаат билет за влез, сепак, инспектори ќе вршат проверки по случаен избор и ќе изрекуваат казни од 50 до 300 евра за секој што не купил билет.
„Никој досега не вовел ваков систем“,
изјави градоначалникот на Венеција, Луиџи Бруниаро.
Според него, целта не е да го затворат градот, туку само се трудат да им овозможат на жителите нормално да функционираат.
Минатата година Венеција ја посетиле околу 20 милиони луѓе, а околу половина од нив престојувале во хотелите и апартманите во градот. Тоа значи дека бројот на туристички легла го надминал бројот на жители на Венеција, каде што според официјалните податоци живеат околу 49 илјади луѓе.
Покрај такса за влез во градот, Венеција забрани влез на големи бродови за крстарење во венецијанската лагуна и најави нови ограничувања за големината на туристичките групи.
„Феноменот на масовен туризам е предизвик за сите европски туристички градови. Но, бидејќи Венеција е помала и почувствителна, таа е уште повеќе погодена од овој феномен и затоа е принудена да преземе мерки пред другите за да се обиде да најде решение“,
рече претставникот на градскиот туризам Симон Вентурини.
Продажбата на билети оваа година е во експериментална фаза.
Воведувањето такса за влез во Венеција се носи во исто време кога и другите популарни европски дестинации размислуваат да воведат мерки за борба против прекумерниот туризам, иако многу од нив веќе имаат воспоставено ноќни туристички такси.
На пример, Барселона од 1 април го зголеми износот на туристичката такса и таа изнесува околу четири евра.
Амстердам, исто така, воведе нови правила за одржување на ноќните забави.