Мировните преговори за ставање крај на украинскиот конфликт би можеле да бидат „димна завеса“ за поекстремни руски воени маневри, предупреди денеска британската министерка за надворешни работи Лиз Трас во интервју за весникот „Тајмс“.
„Јас сум многу скептична. Она што го видовме е обид да се создаде простор Русите да се прегрупираат. Нивната инвазија не оди според планот. Се плашам дека преговорите се уште еден обид да се создаде диверзија и да се создаде димна завеса. Мислам дека сè уште не сме во точка за преговори“,
додаде таа.
Таа ги повтори коментарите на британското разузнавање дека рускиот претседател Владимир Путин би можел да се сврти кон „сè поекстремни акции“, додавајќи дека веќе се видени ужасни злосторства.
Трус рече дека Британија, потенцијално, би можела да дејствува како гарант доколку се постигне некакво решение, и дека Путин „не верувал“ оти меѓународната заедница ќе воведе таков обем на санкции.
Британија неодамна беше насочена кон олигарси од висок профил, вклучувајќи го и сопственикот на фудбалскиот клуб Челзи, Роман Абрамович.
Шефицата на британската дипломатија посочи дека е исклучително тешко да се предвиди укинување на овие санкции, велејќи дека олигарсите му овозможиле на Владимир Путин да го прави тоа што го прави.