Тој ѝ одговори и на Русковска, која направи паралела со упадот во американскиот Конгрес, и порача дека обвинителката тоа го направила за лична промоција пред јавноста и медиумите и за негова јавна дискредитација, а притоа не понудила никаков доказ за некаква поврзаност меѓу упадот во САД и кај нас
Обвинението за организацијата на „27 април“ не е базирано на опширна и детална истрага. Тоа е брзоплето поднесено за да се покаже дека се најдени и обвинети некакви организатори, порача поранешниот претседател на Собранието, Трајко Вељаноски во завршните зборови за овој судски процес каде е еден од обвинетите поранешни функционери.
Тој рече дека од судечкиот совет во Кривичен очекува ослободителна пресуда, а обвинителството да продолжи со темелна истрага за да ги утврди евентуалните организатори.
Вељаноски зборуваше околу 3 часа и детално се осврнуваше на Деловникот тврдејќи дека работел според него и не го прекршил. Ги анализираше и сведочењата на поранешните пратеници кои зборуваа дека тој апелирал да се откажат од збор за што побргу да се завршни конститутивната седница на Собранието во 20017 година.
„Ниту еден доказ не укажува дека јас како претседавач сум направил што било за да се спречи избор на претседател. Од доказите се гледа дека вложувам напори да заврши почнатата седница“,
рече Вељаноски.
Тој ѝ одговори и на обвинителката Вилма Русковска, која на минатото рочиште во своите завршни зборови направи паралела со упадот во американскиот Конгрес од јануари годинава потенцирајќи дека таму сите конгресмени и вработени биле евакуирани веднаш и оти тогашниот потпретседател на САД, Мајк Пенс, застанал против Доналд Трамп и во одбрана на Уставот, за разлика откај нас, каде Вељаноски единствено се грижел за неговиот кабиет и неговото столче.
Во одговорот, Вељаноски возврати дека Русковска си правела јавна промоција и недозволиво е да коментира настани без да понуди докази.
„Може да зборуваме за случувања во многу светски парламенти, но овој суд има задача да ја утврди фактичката положба врз основа на оценка на сите докази поединечно. Столчињата на Трајко Вељаноски, но и на сите други функционери во секој случај се од времен карактер, но не се тема на постапката. Ако настаните во Конгресот на каков било начин се поврзани со овој предмет, тогаш пред судот ќе беа изведувани докази на таа тема. Недозволиво е судската кривична постапка да се користи за лична јавна промоција, ниту пак во постапката пред судот да се коментираат настани врз основа на медиумски известувања. Пред сè тоа е несериозен и непрофесионален пристап во вршењето на одговорната јавнообвинителска функција“,
рече Вељаноски додавајќи дека целта била само негова јавна дискриминација.
Пред Вељаноски, завршни зборови даваше и адвокатот Еленко Миланов, кој е бранител на него, но и на ексминистрите Спиро Ристовски и Миле Јанакиески. Во случајот обвинет е и поранешниот директор на УБК, Владимир Атанасовски.
Со завршените зборови на експретседателот на Собранието, заврши и денешното рочиште. На наредното, останатите адвокати и тројцата обвините ќе ги дадат и нивните завршни зборови.