Исто така, со целовечерен настан на Воениот стадион во Градскиот парк во Скопје ќе бидат одбележани Денот на Армијата и јубилејот „30 години Армија“
Единица на артилерискиот баталјон на Армијата вечер во 19 часот во касарната ,,Илинден“ во Скопје ќе изврши почесна артилериска стрелба со истрелување на 10 плотуни од шест артилериски орудија. Два часа претходно, во периодот од 17 до 18 часот ќе биде извршена и пробна артилериска стрелба со по еден истрел од шест артилериски орудија.
Како што информираат од Генералштабот на Армијата, почесната стрелба е дел од протоколарните обврски на Армијата за одбележување на празници, а е во склоп на активностите кои се реализираат по повод одбележувањето на јубилејот 30 години од формирањето на Армијата.
Исто така, со целовечерен настан на Воениот стадион во Градскиот парк во Скопје ќе бидат одбележани Денот на Армијата, 18 Август, и јубилејот „30 години Армија“.
На настанот што ќе започне во 19:00 часот, ќе присуствуваат министерката за одбрана Славјанка Петровска и началникот на Генералштабот, генерал-потполковник Васко Ѓурчиновски.
Ќе биде презентирана најновата и најсофистицирана опрема на Армијата вклучувајќи ги и новите оклопни транспортери JLTV Oshkosh, ќе бидат прикажани вештините на армиските специјалци, а предвидена е показна точка со армиските кучиња.
Јубилејот на Армијата ќе биде прославен со настап на Воениот оркестар, по што следува богата музичка програма со настапите на Кики (Дајте музика), Пере (Нокаут), Дац и Александар, „Ласт експедишн“, ди-џеј Бабура и танцовото студио „Еурека“.