Центарот за управување со кризи информира дека пожарот во Кичевско е активен веќе неколку денa со различен интензитет. За денеска е планирано негово гаснење од надлежните институции и локалното население
Осум пожари на отворено и неколку помали интервенции се регистрирани во последното деноноќие од Центарот за управување со кризи (ЦУК). Од пожарите што избија вчера, сѐ уште активен е еден пожар кај село Цер, Кичевско. ЦУК информира дека тој пожар е активен веќе неколку денa со различен интензитет.
„Конкретно, регионалниот ЦУК Охрид известува континуирано од 17.06.2024 г. кога во 16:00 часот на единствениот повикувачки број за итни случаи 112 во ЦУК беше добиена информација за пожар на отворено на место викано Рамнин, атар на с. Цер (Општина Кичево), каде почнала да гори нискостеблеста деградирана шума, сува трева и смрека. За настаната состојба веднаш биле известени Општина Кичево, ТППЕ Кичево и Јавно претпријатие ‘Национални шуми’ подружница Лопушник во Кичево, ДЗС и МВР. Во текот на вчерашниот ден (21.06.2024 година), Јавно претпријатие „Национални шуми“ подружница „Лопушник“ не учествувале во гасење на шумскиот пожар, освен што интервенирале 20-тина граѓани од месното население, а е интервенирано од воздух со хеликоптер на МВР што во седум до осум наврати истурил вода на опожарениот простор, при што бил неутрализиран еден крак од пожарот. И покрај ваквите интервенции пожарот не е целосно изгаснат и е се уште активен и постои опасност пожарот да навлезе во букова шума, а во тој случај многу тешко би можел да се контролира“,
велат од ЦУК.
Од ЦУК најавија дека и денеска се планирани активности на надлежните институции и месното население за гаснење на пожарот.
ЦУК посочува дека сите итни случаи треба да се пријавуваат на единствениот повикувачки број за итни случаи 112, особено кога граѓаните имаат животозагрозувачки ситуации.
„ЦУК информира дека имало вкупно 1 704 повици на единствениот повикувачки број за итни случаи 112 во последното деноноќие, од кои ‘реални’ повици биле 64,38%, а 35,62% биле за други потреби на граѓаните што не биле итни. Кон полиција биле упатени 63,79%, кон итната медицинска помош 27,93%, кон пожарникарите 5,52%, од реалните повици кон 112 во ЦУК“,
велат од ЦУК.
*Насловна фотографија: архива