Од ЕК велат дека ќе останат во близок контакт со сите релевантни страни и ќе продолжат да работат со словенечкото претседателство за да се постигне заедничката цел за одржување на првата Меѓувладина конференција со Северна Македонија и Албанија уште оваа година
Еврокомесарот за проширување Оливер Вархеји, кој утрово се сретна со министерот за надворешни работи Бујар Османи, го уверил дека позицијата на Европската комисија (ЕК) за старт на преговори останува непроменета, јави дописничката на МИА од Брисел.
По тет а тет средбата на Вархеји и Османи, од ЕК за МИА соопштија неколку детали за содржината на разговорите.
„Нашата позиција останува непроменета. Со нетрпение ја чекаме првата Меѓувладина конференција со Северна Македонија и Албанија. И двете земји ги исполнија условите и сега е на ЕУ да испорача“,
му порачал еврокомесарот на шефот на македонската дипломатија, вели портпаролката Ана Писонеро за МИА.
Од ЕК додаваат дека сега откако поминаа изборите во Бугарија, Брисел се надева на брз напредок на терен во решавањето на отворените прашања помеѓу Скопје и Софија.
„Комисијата ќе остане во близок контакт со сите релевантни страни и ќе продолжи да работи со словенечкото претседателство за да се постигне нашата заедничка цел за одржување на првата меѓувладина конференција со Северна Македонија и Албанија уште оваа година“,
велат од ЕК и ги охрабруваат С Македонија и Бугарија да изнајдат заеднички прифатливо решение за билатералните спорови.
Одлуката за одржување на првата Меѓувладина конференција, која го означува формалното започнување на преговорите за членство со ЕУ, и усвојувањето на преговарачката рамка, се носи во Советот на ЕУ, односно на ниво на земјите членки, а ЕК има улога на предлагач.
Засега, и покрај сите позитивни сигнали од Европската комисија и од сите земји членки на ЕУ, Бугарија сепак ја блокира Северна Македонија во процесот.
Надежта е дека до 31 декември ќе се изнајде решение. Министерот Османи вчера за МИА изјави дека „алармот е вклучен“ секаде во Европа како и во САД, но дека никој не може да гарантира дека Софија ќе го крене ветото.
Во изјава за неговата дводневна посета, денеска, пак, Османи порачува дека во Северна Македонија е клучот и оти стартот на преговорите ќе биде суштински придонес не само за земјава туку и за целиот регион.