Новата влада на премиерот Христијан Мицкоски ја сочинуваат ВМРО-ДПМНЕ, коалицијата „Вреди“ и Движењето ЗНАМ – За наша Македонија
Еврокомесарот за проширување и соседска политика Оливер Вархеји го честита изборот на новата влада на Северна Македонија. Вархеји кратко по гласањето и давањето заклетва во Собранието, преку објава на социјалната платформа Икс, упати честитки до премиерот Христијан Мицкоски и до членовите на новата влада на земјава.
„Со нетрпение очекувам да работиме брзо со вас за да го унапредиме патот на Северна Македонија кон Европската Унија“,
додава Вархеји во честитката.
Congratulations to Prime Minister @MickoskiHM and members of the new Government!
— Oliver Varhelyi (@OliverVarhelyi) June 23, 2024
Looking forward to work swiftly with you to advance North Macedonia’s ?? #EU ??path.#NorthMacedonia pic.twitter.com/VaWOtMYGdj
Новата влада, чиј претседател е лидерот на ВМРО-ДПМНЕ, Христијан Мицкоски, беше избрана вчера вечер во Собранието со 77 гласа „за“ и 22 гласа „против“. Владината коалиција предводена од ВМРО-ДПМНЕ ја сочинуваат коалицијата „Вреди“ и Движењето ЗНАМ – За наша Македонија.
На синоќешното гласање „против“ новата влада се изјаснија пратениците на СДСМ и на Левица, додека пратениците од коалицијата „Европски фронт“ предводена од ДУИ ја напуштија пленарната сала пред завршувањето на седницата.
Христијан Мицкоски го доби мандат за состав на нова влада откако коалицијата „Твоја Македонија“ предводена од ВМРО-ДПМНЕ победи на парламентарните избори што се одржаа на 8 мај и освои 58 пратенички места.
За денеска во 10 часот е закажано примопредавањето на премиерската функција во зградата. Во зградата на Владата е закажана средба на досегашниот премиер на техничката влада, Талат Џафери, кој ќе му ја предаде функцијата на премиерот на новата политичка влада на земјава, Христијан Мицкоски.
Освен за премиерската, церемонии за примопредавање на функциите ќе има и во министерствата меѓу актуелните министри во техничката влада и новоизбраните министри.