Вакцините кои пристигнуваат во регионот за време на турнејата на еврокомесарот се дел од 651 000 дози кои ги донира ЕУ. Тие во земјите од Западен Балкан ќе пристигнуваат на неделно ниво од мај до август, а од нив за Северна Македонија се наменети 119 123
Еврокомесарот за проширување, Оливер Вархеји, ги однесе првите вакцини во Србија кои се донација од ЕУ. Станува збор за пратка од 1 170 вакцини од „Фајзер“. Во рамки на неговата турнеја на Западен Балкан по повод донацијата, утре еврокомесарот треба да пристигне и во земјава каде првата донирана количина ќе изнесува 4 680 дози од вакцината.
Иста количина ќе добијат и Косово и Албанија, додека Црна Гора ќе добие 2 340, а Босна и Херцеговина 10 530.
„ЕУ во наредниот период ќе биде фокусирана на главното прашање од граѓани: ’Како можам да се вакцинирам‘? Затоа ќе му помогнеме на регионот во создавањето имунитет“,
рече Вархеји за време на обиколката на српскиот Институт за јавно здравје.
Вакцините кои пристигнуваат во регионот за време на турнејата на еврокомесарот се дел од 651 000 дози кои ги донира ЕУ. Тие во земјите од Западен Балкан ќе пристигнуваат на неделно ниво од мај до август, а од нив за Северна Македонија се наменети 119 123.
Вархеји утре во земјава ќе направи обиколка на вакциналниот пункт во А1 Арената во спортскиот центар „Борис Трајковски“, каде ќе го придружува и австриската министерка за Европа и устав, Каролине Едштадлер, со оглед дека Австрија го координира процесот на дистрибуција, а друштво ќе им прават и премиерот Зоран Заев и министерот за здравство, Венко Филипче.