Замислете кога градоначалници би поднеле оставка ако се разочарани од резултатот на националните избори, посочува белгискиот експерт кој беше вклучен во политичките преговори во Пржино, додека СДСМ беше во опозиција
Белгискиот експерт Питер Ванхауте, кој беше вклучен во политичките преговори во Пржино, смета дека премиерот Зоран Заев погрешил што поднел оставка без да се консултира со коалициските партнери. Тој вели, исто така, дека резултатот од изборите на едно ниво не треба да влијае на друго ниво на власта.
„Иако го разбирам мошне добро, ми звучи многу чудно што премиер би решил да поднесе оставка поради разочарувачкиот исход од локалните избори. Во принцип, станува збор за две јасно разделени нивоа на владеење. Исходот од изборите на едно ниво не треба да имаат влијание на друго ниво. Од важност е двете нивоа да бидат разделени, бидејќи целокупната кохезија на политичкиот систем во земјата има потреба од стабилност и граѓаните треба да разберат дека политиката на едно ниво не треба да има непосредно влијание на друго ниво. Замислете кога градоначалниците би поднеле оставка ако се разочарани од резултатот на националните избори. Покрај тоа, имам чувство дека одлуката на Заев е донесена и објавена во јавноста пред да се постигне договор во рамки на неговата коалиција за ова. Како премиер, никогаш не треба да одлучувате да поднесете оставка доколку вашите коалициски партнери не се согласат со тоа како и со следните чекори, што значи, кој ќе ве замени како премиер“,
напиша Ванхауте на Фејсбук.
Тој смета дека не се потребни предвремени избори во С Македонија, туку дека е потребно фокусирање на националните приоритети, како економски развој и подобрување на здравствениот систем.
„Знам дека има потреба од медијација во врска со спорот со Бугарија, но на ова треба да се пристапи на креативен начин, а не да се следат класичните начини на медијација, бидејќи ова не дава никакви резултати. Креативно тука значи поинаку, со фокус на реалните потреби на граѓаните на Северна Македонија, и земајќи ги предвид заемните интереси на Бугарија и Северна Македонија, како и учење како да се разбере минатото и како да се остави зад себе“,
наведува Ванхауте.
Белгискиот експерт посочува дека проблемите што ги гледаме повторно не се ексклузивна одговорност на едната или другата политичка партија, туку се проблем на системот кој е нефункционален, бидејќи се заснова на клиентелизам.
„Тоа е систем заснован на покровител: ако гласате за мене, ако ме поддржувате мене и мојата партија, јас ќе направам нешто за вас за возврат. Во принцип, клиентелизмот може да се гледа како претходница на добра функционална демократија и во таа смисла нема ништо лошо во тоа, затоа што докажува дека политичарите се грижат за граѓаните. Сепак, клиентелизмот е некомпатибилен со функционална демократија, бидејќи не ги третира сите граѓани подеднакво“,
наведува Ванхауте.