Со поместувањето на стрелките на часовникот за еден час наназад почнува зимското сметање на времето кое треба од секој последен викенд во октомври, па сè до последниот викенд во март следната година, кога повторно настапува летно сметање на времето
Викендов, во текот на ноќта, на преминот од сабота кон недела, во три часот по полноќ, почнува зимското сметање на времето. Тоа значи дека стрелките на часовникот треба да се поместат еден час наназад, односно од 3 на 2 часот.
Зимското сметање на времето почнува секој последен викенд во октомври и трае до последниот викенд во март следната година, кога повторно настапува летно сметање на времето.
Од Министерството за економија велат дека донесувањето на оваа одлука придонесува кон следење на долгорочната економска политика на Република Северна Македонија за асоцирање кон Европската Унија, како и водење сметка за непречено функционирање на одредени сектори не само за транспорт и врски туку и други сектори од индустријата кои бараат стабилно и долгорочно планирање.
Исто така, додаваат од Економија, со ова се води сметка за непречено функционирање на внатрешниот и надворешниот пазар, олеснување на транспортот и комуникациите и географската положба, намалување на стопанските и нестопанските влијанија, а посебно врз користењето на електричната енергија, здравјето на човекот, работната способност, начинот на живеењето, земјоделството, заштитата на животната средина, безбедност во сообраќајот, туризмот и индустријата.
Секои шест месеци во земјава, како и во другите земји од континентот граѓаните поминуваат низ ритуалот на поместување на стрелките на часовникот за еден час наназад (ако станува збор за премин од летно во зимско сметање на времето) и еден час нанапред (ако часовникот се враќа на летно сметање).
Владата минатата година го задолжи Министерството за економија да ги разгледа можностите околу евентуално продолжување на примената на летното сметање на времето, со цел дополнителни заштеди во општата потрошувачка на електрична енергија.
Но, по направените анализи Владата одлучи дека сепак нема да има промена во досегашниот систем на сметање на времето, односно, како и секоја година во последната недела од октомври стрелките на часовникот да се поместат еден час назад.
Во март 2021 година, кога се менуваше сметањето на времето од зимско во летно, оваа пракса требаше да прекине во земјите членки на Европската Унија, но тоа не се случи.
Имено, во 2018 година Европската комисија ги праша граѓаните на ЕУ што мислат на оваа тема. Резултатот од онлјан анкетата покажа дека 83 отсто од граѓаните на ЕУ се изјаснија за укинување на промената од зимско во летно сметање на времето. Учесниците во анкетата како причина за својот став да се укине промената на сметањето на времето наведуваа дека тоа им предизвикува здравствени проблеми.
Европскиот парламент за тоа гласаше во 2019 година, а одлуката требаше да биде спроведена во 2021 година. Оттогаш работите речиси мируваат.
Летното сметање на времето за првпат било воведено во Германија во 1916 година, со цел работниот ден да се одвива што подолго додека е ден и така требало да се заштеди на струја.
Летното сметање на времето во поранешна Југославија, а со тоа и во Македонија, е воведено на 27 март 1983 година.
Оттогаш, на пролет ги поместуваме часовниците еден час напред, а на есен час наназад.