За утре во 15 часот е закажана свечената собраниска седница по повод ратификацијата на Протоколот за членство на нашата земја во НАТО. Со оглед на тоа што е поканет да присуствува речиси целиот државен и политички врв во земјава, како и гости од седиштето на НАТО и од земјите членки во регионот, се планира седницата да може да се следи и од втората по големина сала во парламентот, покрај салата за пленарни седници.
Според сценариото за одржување на седницата, по нејзиното завршување, знамето на НАТО ќе биде подигнато на јарболите пред собраниската зграда, заедно со знамето на Северна Македонија.
*Поврзана вест: „Ладна проба“ за знамето на НАТО пред македонскиот парламент
Северна Македонија, всушност, нема последна да го ратификува Протоколот за својот влез како 30. членка во НАТО, како што е вообичаената процедура на организацијата. Поради тоа што парламентот веќе в среда треба да гласа за самораспуштање, законот „за ратификација на Северноатлантскиот договор“ (како што гласи точката на дневен ред на 133. собраниска седница) ќе се донесе со клаузула за одложено дејство. Поточно, тој ќе стапи во сила откако и Шпанија ќе биде „запишана“ како последната земја членка на НАТО која ќе го ратификува Протоколот за нашата држава.
Предлог-законот за ратификација на Северноатлантскиот договор го донела политичката влада на СДСМ и на ДУИ, на една од последните седници, одржана на 28 декември 2019 година. На предлог-законот, за кој утре ќе гласаат македонските пратеници, е потпишан доскорешниот премиер Зоран Заев.
Претседателот на Собранието Талат Џафери минатата недела во емисија на „Алсат“, рече дека е можно официјализирањето на членството на Северна Македонија во НАТО да се случи среде изборна кампања, но нагласи дека тоа е случајност, затоа што станува збор за процес кој трае подолго време.