На протестот превозниците ќе бараат средба со директорот на ЈСП, а се подготвуваат и барања за прием до Град Скопје и до Владата
Дел од приватните автобуски превозници за утре наутро најавуваат дека ќе имаат протест пред седиштето на Јавното сообраќајно претпријатие во населбата Автокоманда. Протестот е најавен дека ќе почне од 9 часот.
Протестот, како што вели Исен Халили од „Макекспрес“, кој бил договорен на вчерашната средба на превозниците, е поради тоа што решавањето на нивниот проблем се одолговлекува, а тие се без работа и имаат трошоци.
На протестот превозниците ќе бараат средба со директорот на ЈСП, а се подготвуваат и барања за прием до Град Скопје и до Владата.
Милоград Димитриевски, еден од сопствениците на „Макеспрес“ потврди дека таков состанок е одржан.
„Превозници од ‘Макекспрес’ и ‘Слобода превоз’ сами одржале состанок и се договориле утре од девет часот да одржат протест пред седиштето на ЈСП во Автокоманда. Јас не бев присутен на тој состанок, но ја добив информацијата од колегите кои биле присутни, дека така е договорено. Има информации во јавноста дека 5 000 денари биле исплатени на ‘Слобода превоз’, по кој основ, не знам. Кај нас немаат префрлено ништо од 2 ноември наваму“,
вели Димитриевски за МИА.
Претседатлот на „Слобода превоз“ , Ленин Јовановски за МИА вели дека тој лично не е информиран за протест што ќе се одржи утре пред седиштето на ЈСП во Автокоманда.
Приватните превозници пред три месеци престанаа да бидат дел од градскиот јавен превоз поради долгови што бараа да им бидат исплатени од Град Скопје, а поради тоа што градоначалничката на Скопје, Данела Арсовска им ги раскина договорите.
Приватните превозници од „Слобода превоз“ и „Макекспрес“ започнаа со блокада на главниот град на 28 ноември кога со околу 30 автобуси на крстосницата кај ТЦ „Мавровка“, односно булеварите „Гоце Делчев“ и „Крсте Петков Мисирков“, побараа да им бидат исплатени долговите за да можат да почнат повторно со работа.
Откако немаше исход, приватните превозници на 5 декември оваа година со околу 200 автобуси поставија блокади на неколку главни точки во Скопје, односно на крстосниците пред ТЦ „Мавровка“, Црвен Крст, како и булеварот „Илинден“.
Потоа ги одблокираа крстосниците кај „Мавровка“ и Црвениот крст и останаа да протестираат само на булевар „Илинден“, непосредно околу просториите на Град Скопје.
Во меѓувреме градските власти ги отфрлаа наводите дека им должат пари.
По девет дена блокада, превозниците ги тргнаа автобуси затоа што добија ветување од премиерот Димитар Ковачевски дека ќе оствари средба со нив, но под услов да престанат со блокадите.
По ова, јавниот градски превоз продолжи да сообраќа само со автобусите на ЈСП, а Град Скопје објави два огласи за приватни превозници на кои не се пријави ниту една компанија.