Приватните превозници се надеваат дека со почетокот на медијацијата во Владата ќе бидат подготвени спогодбено да ја решат состојбата, односно ќе се најде решение со каква динамика би се исплатил долгот
Приватните превозници од „Слобода превоз“ и „Макекспрес“ денеска официјално поднесоа барање за средба со премиерот Димитар Ковачевски за решавање на проблемот што го имаат со Град Скопје околу исплатата на долгот што го има кон нив.
„По повеќедневната голгота која ја преживеавме на булеварите каде што дежуравме деноноќно како последица на тоа што градските власти на чело со градоначалничката немаше слух да нè прими да поразговараме, блокадите ги тргнавме по обраќањето на премиерот Димитар Ковачевски. Тој вчера рече дека би можел да биде медијатор и да не собере сите засегнати страни за да го решиме проблемот, но само ако бидат тргнати блокадите и во една релаксирана и мирна атмосфера да можеме да ги изнесеме сите аргументи како би можело да дојде до решавање на нашиот веќе познат проблем“,
истакна на денешната прес-конференција Кемал Муриќ од „Слобода превоз“ кој додаде дека преговорите со Владата ќе ги води директорот на „Слобода превоз“, Ленин Јовановски.
Според него, до овој момент нема конкретен датум за средбата, но очекуваат тоа да се случи многу брзо.
Муриќ се надева дека со почетокот на медијацијата во Владата ќе бидат подготвени спогодбено да ја решат состојбата, односно ќе се најде решение со каква динамика би се исплатил долгот.
Приватните превозници вчера ги тргнаа автобусите од булеварот „Илинден“ откако ги послушаа сугестиите на премиерот Димитар Ковачевски.
Приватните превозници од „Слобода превоз“ и „Макекспрес“ започнаа со блокада на главниот град на 28 ноември кога со околу 30 автобуси на крстосницата кај ТЦ „Мавровка“, односно булеварите „Гоце Делчев“ и „Крсте Петков Мисирков“, побараа да им бидат исплатени долговите за да можат да почнат повторно со работа.
Откако немаше исход, приватните превозници на 5 декември оваа година со околу 200 автобуси поставија блокади на неколку главни точки во Скопје, односно на крстосниците пред ТЦ „Мавровка“, Црвен Крст, како и булеварот „Илинден“.
Во петокот ги одблокираа крстосниците кај „Мавровка“ и Црвениот крст и останаа да протестираат само на булевар „Илинден“, непосредно околу просториите на Град Скопје.