Ваквите законски измени, кои првично беа иницирани за олеснета набавка на лекот „трикафта“, кој им е неопходен на пациентите со цистична фиброза, ќе овозможат освен овој лек, директно и по пониска цена да се набавуваат и други лекови кои имаат едиствен производител
Пратениците на денешната 106. седница ги усвоија законските измени со кои државата ќе може да набавува одредена количина од некој лек во директни преговори со неговиот производител. Законските измени предвидуваат олеснета набавка на лекови кои главно се наменети за пациенти со ретки и тешки болести.
Ваквите законски измени, кои првично беа иницирани за олеснета набавка на лекот „трикафта“, кој им е неопходен на пациентите со цистична фиброза, ќе овозможат освен овој лек, директно и по пониска цена да се набавуваат и други лекови кои имаат единствен производител.
Собранието ги усвои и измените на Законот за здравствено осигурување, кој, исто така, е поврзан со лекови за ретки болести и се однесува на комисијата која предлага лекови што се на товар на ФЗО.
Минатата недела во Универзитетската клиника за детски болести пристигна лекот „трикафта“ за осумте пациенти со цистична фиброза кои се во најкритична состојба, а со законските измени потребната терапија треба да ја добијат и останатите пациенти со оваа дијагноза.
Пратениците од ВМРО-ДПМНЕ на седницата порачаа дека ќе ги поддржат законските измени, но изразија сомнеж дека на маката на болните некој ќе прави криминал, зашто предлогот е надвор од Законот за јавни набавки.