Уставниот суд на денешната седница го одложи донесувањето нацрт-решение во врска со оцената на уставноста на членот 11-а од Законот за дополнување на Законот за помилување, кој се однесува на правото на претседателот на државата да поднесе барање за поништување на одлуката за помилување.
Судот на седница на 27 ноември поведе постапка за оцена на уставноста на членот 11-а од Законот за дополнување на Законот за помилување од 2016 година.
Законодавно-правната комисија на Собранието, расправајќи по иницијативата на пратениците од власта Сашко Костов и Диме Велковски, на почетокот на овој месец донесе одлука дека не може да има автентично толкување на членот 11 од истиот закон (на кој е додаден ставот а) бидејќи тој член не постои, односно е укинат со измените во 2009 година.
Претседателот на Уставниот суд, Сали Мурати, во интервју за МИА рече дека Уставниот суд при одлучувањето ќе ја земе предвид одлуката на Собранието.