На Македонија, рекол лидерот на ВМРО-ДПМНЕ на средбата, и е потребна интеграција во ЕУ базирана на извесна иднина без дополнителни условувања и уцени
Блокадата со која се соочува државата на патото кон ЕУ поради потребата од уставни измени е доказ за погрешните чекори и слепата улица во кој е доведена Македонија како последица на капитулантската надворешна политика.
Ова го истакнал лидерот на ВМРО-ДПМНЕ, Христијан Мицкоски на денешната средба со амбасадорот на Унгарија во земјава, Андраш Клајн, соопштија од партијата.
Лидерот на опозициската партија рекол дека уставни измени под бугарски диктат нема да се случат.
„Уставни измени од оваа власт, под ваков бугарски диктат нема да се случат, а сите спротивни изјави од првенците на власта се само евтин политички маркетинг и де фокус од нивната неспособност. Власта нема мнозинство гласови да работи спротивно од волјата на народот“,
посочил Мицкоски на средбата со Клајн.
На земјава, рекол лидерот на ВМРО-ДПМНЕ, и е потребна интеграција во ЕУ базирана на извесна иднина без дополнителни условувања и уцени.
На средбата, како што се додава во соопштението, тој ја истакнал и својата загриженост за тешката економска состојба, енергетската криза и растечката инфлација.