Иако судиите се согласиле дека има повреда, на денешната седница на Уставниот суд немало мнозинство гласови за сите точки кои го сочинуваат конечниот предлог, а се однесуваат на правната судбина на пресудите од двата суда
Уставните судии утврдија дека Основниот граѓански суд Скопје и Апелацискиот суд со своите пресуди му го повредиле правата на новинарот Влатко Стојановски од „Фокус“ во врска со упадот во Собранието на 27 април 2017 година.
Стојановски ја тужеше државата за повреда на слободата на изразување и настаните, меѓутоа Граѓанскиот суд го одбил со образложение дека членот 10 од Европската конвенција за човекови права се однесувал на овозможување на секој да го изрази своето мислење во секојдневното живеење, а не во услови кога се случуваат акти на насилство како што бил настанот од „крвавиот четврток“.
По ова, Стојановски се обрати до Уставен со барање да се утврдат повреди на уставно загарантираните слободи и права, кои според него се направени со пресудите на првостепениот и второстепениот суд.
Иако судиите се согласиле дека има повреда, на денешната седница немало гласање бидејќи не се усогласиле околу правната судбина на двете пресуди односно дали да се поништат или не.
„Во текот на советувањето и гласањето судиите го усогласија ставот дека со пресудите е направена повреда на неговите права, но Уставниот суд немаше мнозинство гласови за сите точки кои го сочинуваат конечниот предлог, а се однесуваат на правната судбина на двете пресуди, што значи дека овој предмет не е завршен“,
велат од Уставен.
Предметот, најавуваат оттаму, ќе биде повторно ставен на дневен ред на некоја од наредните седници.