Судиите едногласно зазедоа став дека не постојат услови за прифаќање на иницијативата на судијата Осман Кадриу за поведување постапка по службена должност за оценување на уставноста и законитоста на Одлуката за распуштање на Собранието, соопшти Уставниот суд
Овој заклучок на уставните судии значи дека Собранието нема повторно да проработи што, пак, оди во прилог на сценарио за избори пред летото
Судиите на Уставниот суд, денес по завршувањето на XII седница на Судот, одржаа работен состанок на кој беше разгледана иницијативата на судијата д-р Осман Кадриу за поведување постапка по службена должност за оценување на уставноста и законитоста на одлуката за распуштање на Собранието на Република Северна Македонија („Службен весник на Република Северна Македонија“ бр. 43/2020).
По дискусијата од страна на сите судии, судиите едногласно зазедоа став дека не постојат услови за прифаќање на иницијативата, пишува во соопштението од Уставен.
„Ова е од причина што во случајот станува збор за пресудена работа, што значи дека Судот веќе се изјасни за уставноста и законитоста на оваа одлука на Собранието во предметот У.бр. 40/2020, на седницата одржана на 8 и 15 април 2020 година, кога со мнозинство гласови одлучи да не поведе постапка за оценување на нејзината уставност и законитост. Притоа тогаш во расправата беа земени предвид и околностите на кои се укажува со иницијативата“,
пишува во соопштението од Уставен суд.
Решението на кое се повикува Уставен беше донесено по иницијатива на Светскиот македонски конгрес и може интегрално да го прочитате ТУКА.
Овој заклучок на уставните судии значи дека Собранието нема повторно да проработи што, пак, оди во прилог на сценарио за избори пред летото.