Уставниот суд на денешната седница утврди повреда на слободата на јавно изразување на мислата на новинарот Влатко Стојановски за време на настаните во Собранието на 27 април 2017 година. Според судот, во две пресуди – една од Граѓанскиот суд Скопје од 2021 година и една од Апелациониот суд Скопје исто од 2021 година е пропуштено да се утврди повреда на слободата на изразување.
„Појдовна основа за заземањето на овој став на Судот е тоа што слободата на медиумите како составен дел од слободата на изразувањето, ја опфаќа слободата на јавното информирање и слободното примање и пренесување на информации за прашањата од јавен интерес“
соопшти Уставниот суд.
Од судот додаваат дека сето ова претставува предуслов на постоење на демократско општество, бидејќи како што велат, слободната комуникација на информации и идеи за политичките и другите општествени прашања од јавен интерес се од суштинско значење.
„Ова имплицира слобода на медиумите да добиваат информации врз основа на кои тие ќе можат да ја остваруваат својата улога, да коментираат и известуваат за сите значајни прашања од јавен интерес. Наведените околности се важни и релевантни, но не се земени во предвид од страна на надлежните судови кои одлучувале по барање на подносителот“
потенцираат од Уставниот суд.
Одлуката е конечна и со тоа барателот ќе може неговите права да ги оствари пред надлежните судови.