Прашан за коментар на соопштението на ДУИ, првиот вицепремиер и министер за животна средина и просторно планирање, Изет Меџити, денеска во изјава за медиумите од настан во Тетово рече дека дискусијата за Законот за употреба на јазиците е отворена поради нецелосните решенија и досегашните политики што ги водела Демократската унија за интеграција
Уставниот суд нема да ги коментира политичките изјави и реакции што доаѓаат во пресрет на седницата закажана за в среда на која треба да се разгледува уставноста на Законот за употреба на јазиците.
Овој став на Уставен доаѓа по денешното соопштение на Демократската унија за интеграција, во кое од партијата предупредија дека ако се укине Законот, последиците ќе бидат непоправливи и тие нема да можат да преземат одговорност за тоа што може да се случи потоа.
„Судот нема да коментира ничии ставови. Седницата на која ќе се дискутира за Законот за употреба на јазиците е закажана за 11 декември. По завршување на седницата ќе се одржи редовна прес-конференција на која ќе биде одговорено на сите прашања“,
велат од Уставен.
Инаку, од ДУИ денеска рекоа дека укинувањето на која било одредба од Законот за употреба на јазиците не е само правен чин, туку директен удар врз стабилноста и мирот на државата.
„Овој закон е производ на сложен компромис, постигнат по години на макотрпни преговори и претставува темел на меѓуетничката еднаквост и заемната почит. Одлука која би го загрозила овој закон би претставувала тешко кршење на Охридскиот договор и враќање назад кон неизвесна и нестабилна иднина“,
велат од Демократската унија за интеграција.
Оттаму посочија дека уставните судии од албанска етничка припадност јавно изјавиле дека ќе ја бојкотираат оваа седница и одлучување, што, според партијата, го прави уште поопасно едностраното решение за укинување на одредбите од Законот за јазиците.
„Овој бојкот е јасен показател дека ваквите напори за укинување на 10 члена од овој закон имаат длабоко дискриминаторска природа и целат на ‘поништување’ на албанскиот јазик на институционално ниво“,
додаваат од партијата.
Воедно од ДУИ упатија апел до граѓаните, политичките лидери и меѓународната заедница да дејствуваат за да го спречат чинот кој, како што велат, ја загрозува стабилноста на земјата и регионот.
Прашан за коментар на соопштението на ДУИ, првиот вицепремиер и министер за животна средина и простроно планирање, Изет Меџити, денеска во изјава за медиумите од настан во Тетово рече дека дискусијата за Законот за употреба на јазиците е отворена во јавноста поради нецелосните решенија и досегашните политики што ги водела Демократската унија за интеграција.
„Сега се соочуваат со одговорноста и пред одговорноста им треба магла, им треба дестабилизација. Но, ако во државата некој нема право значи за ова прашање, тоа е ДУИ. Со нивните половични, нецелосни решенија дадоа можност некој денес да се занимава со ова прашање. Ова прашање да беше апсолвирано како што треба, да имаше закон за албанскиот јазик по сите теркови денес немаше да биде тема на дискусија. Тема на дискусија е поради половичните и нецелосните решенија токму на ДУИ“,
рече Меџити.
Осврнувајќи се на одлуката што треба да донесе Уставниот суд, првиот вицепремиер кажа дека станува збор за чувствително прашање, кое не е само правно, туку и политичко.
„Рамковниот договор е дел од уставниот поредок на Република Македонија. Врз основа на Рамковниот договор и сите тие кои ѝ посакуваат добро на државата, добро на меѓуетничките односи, на стабилноста, треба разумно да пристапиме кон овој договор. Нема да навлезам во таа работа на Уставниот суд. Јас само повикувам дека ова не е правно прашање, туку и политичко прашање што ја тангира и стабилноста на државата“,
рече Меџити.
Тој и вчера говореше на оваа тема одговарајќи на новинарски прашања за време на настан во Липково, каде што рече дека има најави оти на седницата на Уставен суд нема да присуствуваат двајца судии. Тоа, кажа вицепремиерот, ќе значи дека одлуките нема да бидат легитимни.
Претседателот на Уставениот суд, Дарко Костадиновски, минатиот месец во телевизиско гостување рече дека во декември на дневен ред ќе биде овој предмет и дека за него постои заклучок оти ќе се одлучува во полн состав на Уставниот суд односно со 9 судии.
Костадиновски тогаш рече дека не сака да верува во шпекулации и во сценарија дека судиите од немнозинските заедници би бојкотирале, што би значело дека нема да може да се расправа за иницијативите ако судот не е во полн состав.
Законот за употреба на јазиците е оспорен со 12 иницијативи поднесени од граѓани, политички партии и здруженија. Оспорен е Законот во целина и најголем дел од членовите одделно, како и Указот за прогласување на Законот. Единствено не е оспорен ставот 1 од членот 1 кој вели дека на целата територија на државата и во нејзините меѓународни односи службен јазик е македонскиот јазик и неговото кирилско писмо.