Уставниот суд денеска не расправаше за уставноста на ставот 5 од членот 353 од Кривичниот законик, кој се однесува на функционери и јавни набавки. Судиите одлучиле да го одложат одлучувањето за оваа точка и се договориле прво да одржат подготвителна седница на која ќе поканат луѓе од стручната и експертската јавност, за да разменат мислења и ставови, а потоа да одлучуваат.
Таквата подготвителна седница, според првичните најави, би се одржала по сезоната на одмори, односно најрано во септември. Покрај оваа, одлучено е подготвителна седница да има за околу 3-4 точки од иницијативите кои беа на дневниот ред за денешната седница во Уставен.
Меѓутоа, иницијатива која се однесува на ставот 5 од членот 353 во Кривичниот законик е најинтересна бидејќи би можело да дојде до застарување или поблаги казни во обвиненијата за функционерите. Кривичното дело е злоупотреба на службената положба и овластувања, а ставот 5 предвидува дека ако тоа е направени при вршење јавни набавки или е нанесена штета на Буџетот сторителот ќе се казни со најмалку 5 години затвор.
Иницијативи за овој став до Уставен ја поднесе адвокатот Еленко Миланов, кој е еден од бранителите на поранешни функционери обвинети од СЈО.
Се оспорува делот за минимум 5 години затвор, како и одредбата која важеше претходно – минимум 4 години затвор.
Во случај уставните судии да одлучат дека тие се неуставни, би се отворил патот предметите да застарат побргу или да се донесуваат поблаги затворски, но и условни казни.