Уште три лица починаа од коронавирусот во Грција, со што бројката на смртни случаи во земјата стигна до 20. Потврдени се и 48 нови заразени, така што досега во Грција се регистрирани 743 лица со коронавирус.
Како што јави МИА од Атина, хоспитализирани се 134 лица, од кои 60 отсто се мажи.
Заменик – министерот за цивилна заштита на Грција Никос Хардаљас, на денешната прес конференција, рече дека меѓу новите 48 случаи има и 21 од вкупно 263 лица кои се вратиле од Барселона и Мадрид и се во карантин во хотел во Атина. Во тојконтекст, Хардаљас истакна дека била спречена „санитарна бомба спремна да експлодира“.
„За жал, нашите стравувања беа потврдени. За среќа за општеството, државата го стори она што требаше. Ве информирам дека беше спремна да експлодира една санитарна бомба, со што ќе се забрзаше ширењето на вирусот во земјата, и покрај мерките и жртвувањата на сите нас за да го спречиме најлошото“,
рече Хардаљас, објаснувајќи дека одлуката за изолација била базирана на конкретни модели што се спроведуваат и во други земја.