Унгарската влада неколку пати го одложуваше гласањето во парламентот, додека речиси сите други членки на Алијансата ја ратификуваа кандидатурата на Финска
По неколку месеци одложување, парламентот на Унгарија денеска ја поддржа кандидатурата на Финска за членство во НАТО. За одобрување на кандидатурата гласаа 182 пратеници, а шест се изјаснија „против“.
Унгарската влада неколку пати го одложуваше гласањето, додека речиси сите други членки на Алијансата ја ратификуваа кандидатурата на Финска.
Поддршката од Унгарија ја носи оваа нордиска земја чекор поблиску дп полноправно членство во НАТО.
Прифаќањето на нова земја бара едногласност на сите земји членки, а од 30-те членки на Алијансата, сега се чека само Турција да ги ратификува договорите за влез на Шведска и Финска во НАТО.
Турскиот претседател Реџеп Таип Ердоган рече дека Турција ќе го започне процесот на ратификација на кандидатурата на Финска за членство во НАТО во парламентот, откако земјата презеде конкретни чекори за исполнување на своите ветувања.
Додаде и дека Турција ќе ги продолжи разговорите со Шведска, а дека ратификувањето на нејзината кандидатура за членство во НАТО директно ќе зависи од мерките што ќе ги преземе.
Финска и Шведска поднесоа барање за членство во НАТО непосредно по почетокот на руската инвазија на Украина, но особено Шведска се соочи со неочекувани приговори од Турција. Анкара го обвинува Стокхолм дека засолнува, како што вели, членови на терористички групи и бара нивна екстрадиција како чекор кон давање зелено светло на Шведска за членство во НАТО.