Во моментов, од сите кои доаѓаат од земјите со повисоки стапки на инфекција се бара да бидат во двонеделен карантин, доколку не сакаат да направат два ПЦР теста, кои мора да бидат негативни
Унгарија планира да ги заостри мерките на граничните премини од 1 септември за да го спречи ширењето на коронавирусот, поради зголемениот број на заразени во соседните земји, најави унгарскиот премиер Виктор Орбан.
Тој рече дека со оглед на тоа што почнува новата учебна година, не е можно да се продолжи со сегашниот систем на гранични премини. Во моментов, од сите кои доаѓаат од земјите со повисоки стапки на инфекција се бара да бидат во двонеделен карантин, доколку не сакаат да направат два ПЦР теста, кои мора да бидат негативни.
Орбан не кажа детали за планираното заострување на режимот на границите.
Поради најавените нови мерки, на Унгарците веќе им се советуваше да избегнуваат одмори во странство од следниот месец.
Во Унгарија, од почетокот на пандемијата до денес, вкупно се регистрирани 5 098 заразени, од кои 611 починале. Во изминатите 24 часа, регистрирани се 52 нови случаи за заболени и двајца починати.