Во фокусот на средбата, која е одржана за време на официјалната посета на градоначалникот на Чаир, Изет Меџити на Турција, се разговарало за можностите за обезбедување стручна експертиза и финансиска поддршка за реализација на проектот
Турската општина Бурса ќе им го сподели своето искуство на надлежните во земјава за реставрација и ревитализација на Старата скопска чаршија. Ваквата можност била разгледана на средбата на градоначалникот на Општина Чаир, Изет Меџити, со Шахин Биба, кој денес раководи со Бурса.
Во фокусот на средбата, која е одржана за време на официјалната посета на Меџити на Турција, се разговарало за можностите за обезбедување стручна експертиза и финансиска поддршка за реализација на проектот.
Во разговорите со Биба, кој е по потекло од Призрен, градоначалникот на Чаир нагласил дека врските на Албанците со нивното место на потекло претставуваат значаен потенцијал за воспоставување конкретни партнерства, како и зачувување и развој на историското и културното наследство.
Како дел од иницијативата, предвидено е формирање совет за лобирање и поддршка на проектот, во кој ќе бидат вклучени Шахин Биба, заменик-министерот за култура Реџеп Алтепе, Бајрам Вардар и други јавни личности со потекло од Балканот. Целта на ангажманот, посочуваат од Општина Чаир, е проширување на институционалната поддршка и обезбедување нови партнери за реализација на проект што ќе го поврзе зачувувањето на историската автентичност на Старата скопска чаршија со нејзиниот економски и туристички развој.