Придавката „северномакедонски“ двапати се користи во објавата на Золтан Ковач, државен секретар за меѓународна комуникација на унгарската влада, во која тој информира за помошта при гасењето на пожарите што Македонија ќе ја добие од Унгарија
Золтан Ковач, државен секретар за меѓународна комуникација во унгарската влада, на социјалната мрежа Х напиша дека шефот на унгарската дипломатија Петер Сијарто објавил оти Унгарија ќе обезбеди три теренски противпожарни возила за Северна Македонија за да помогне во борбата против шумските пожари.
Во постот Ковач пишува дека ваквиот чекор е преземен по реализираниот телефонски повик со, како што вели, „северномакедонскиот колега“ на Сијарто.
Придавката „северномакедонски“ тој ја користи двапати во изјавата:
„За жал, нашите северномакедонски пријатели сега се соочуваат со извонредни предизвици предизвикани од овие пожари, ние како пријатели мораме да помогнеме. Тој (Сијарто, н.з) потврди дека Унгарија ќе испрати три противпожарни возила способни да гаснат пожари од непосредна близина. Министерот Сијарто изрази надеж дека оваа помош ќе ѝ помогне на Северна Македонија брзо да ги стави под контрола шумските пожари. Тој, исто така, им се заблагодари на Министерството за внатрешни работи и министерот Шандор Пинтер за нивната брза реакција“,
напиша Ковач на социјалната мрежа Х.
Засега нема официјална реакција од македонска страна за употребата на непостоечката придавка „северномакедонски“ од Золтан Ковач. Неофицијално, македонското МНР веќе реагирало.
Инаку, како што денеска информираа од Центарот за управување со кризи (ЦУК), летала пристигнуваат како меѓународна помош обезбедена со механизмот на ЕУ за цивилна заштита.
Од Србија, додаваат од ЦУК, утрово во 9:45 часот на скопскиот аеродром веќе слетал еден хеликоптер „агуста бел 212“.
Вечерва, пак, се очекува да пристигне чешкиот хеликоптер „блек хаук“ со капацитет на ведро од три тони.
За двата „ертрактори“ што се најавени од Германија, од ЦУК велат дека дополнително ќе известат кога може да пристигнат.