Независната угостителска комора утрово ги испратила овие барања до Комисијата за заразни болести и до Министерството за здравство
Укинување на ограничувањето на работното време и на одлуката за забрана со работа во внатрешните делови на угостителските објекти или, во најмала рака, дозвола за работа во внатрешноста на оние објекти што имаат „златен сертификат“, се дел од барањата што Независната угостителска комора утрово ќе испратила до Комисијата за заразни болести и до Министерството за здравство.
Од НУК бараат да се укине и забраната за настап на музички групи во угостителските објекти и да се дозволи одржување настани, прослави и веселби во сите угостителски објекти согласно предлог-протоколи што треба да се изготват. Се предлага да се дозволи на иста маса соодветно да седат шест или повеќе лица.
„Во случај кога се работи за една цела фамилија (традиционални фамилии од повеќе генерации) со повеќе од четири лица, да се дозволи да можат како фамилија да седнат сите на една маса, а не да ги навредуваме фамилијарните вредности и да ја делиме фамилијата што живее под еден ист кров на две или повеќе маси само затоа што истата е поголема од четири лица“,
наведува НУК.
Од НУК очекуваат дека Комисијата за заразни болести ќе ги земе предвид овие нивни предлози при креирањето на новите мерки.