Останува препораката за носење заштитна маска на отворено. Според министерот за здравство Венко Филипче, сѐ уште е рано да се смени оваа мерка
Полицискиот час синоќа почна од полноќ и траеше до четири часот изутринава согласно владината одлука од вторникот, на предлог на Комисијата за заразни болести за олабавување на рестриктивните мерки. Вака ќе остане до вторник, 18 мај.
Олабавувањето на рестриктивните мерки следува по намалувањето на бројот на новозаболени и хоспитализирани на коронавирусот во изминатиот период и намалувањето на притисокот врз болничките капацитети.
Со продолжено работно време до 23:30 часот работат и угостителските објекти на летните тераси, а со работа почнаа и фитнес-клубовите, спортските центри, салите за вежбање и игротеките, но за нив е задолжително почитување на протоколите за работа.
Спортските натпревари и понатаму ќе се одржуваат без физичко присуство на публика.
Како дел од олабавувањето на рестриктивните мерки е и дозволата да се организираат настани и слични јавни активности согласно протоколите за работа, односно до 30 проценти исполнетост на капацитетите во внатрешноста на објектите и до 50 проценти исполнетост на отворен простор.
Засега останува забраната за свадби и концерти.
Останува и препораката за носење заштитна маска на отворено. Според министерот за здравство Венко Филипче, сѐ уште е рано да се смени оваа препорака. За ова било разговарано на последниот состанок на Комисијата за заразни болести, но заклучокот бил дека е рано за укинување на оваа препорака.
Согласно новите мерки, сега и на здравствените работници им се дозволува користење годишен одмор и платени отсуства, но тоа ќе се прави согласно планот на раководителот на установата за да се наруши нормалното и тековно функционирање на системот на работа во здравствените установи.
Во градинките е дозволено зголемување на бројот на згрижени деца најмногу до 15 во воспитните групи до двегодишна возраст и до 20 деца во воспитните групи од 2 до 6-годишна возраст.