Училиштата не се трансмитери на коронавирусот и тие засега остануваат отворени. Ако во иднина треба да се донесе поинаква одлука, таа ќе се носи врз основа на препорака од Комисијата за заразни болести.
Ова го тврди министерката за образование Мила Царовска во интервју за државната новинска агенција МИА.
Таа оценува дека сите мерки кои се спроведуваат се добри и го даваат очекуваниот ефект.
„Се почитуваат правилата и можеме да констатираме дека училиштата не се трансмитери на вирусот. Имаме помалку од еден процент заразени ученици и наставници во училиштата. Така што, сега засега остануваат отворени за учениците од прво до трето одделение и за оние ученици од погорните одделенија каде има можност да се следи настава во училница. За секоја промена, јавноста навремено ќе биде известена и бидете сигурни дека секоја одлука, како и досега, ќе се носи по препорака на Комисијата за заштита од заразни болести, бидејќи тоа експертско и стручно тело најдобро знае како треба сите ние да постапуваме во секоја прилика, согласно со развојот на епидемиолошката слика и трендовите во глобални размери по однос на ова прашање“,
вели Царовска.
Министерката е задоволна како се одвива наставата од почетокот на учебната година на 1 октомври, посочувајќи дека сега над 90 отсто од учениците во државата успешно следат онлајн-настава, а се намалува и бројот на деца кои немаат ИТ-уреди. Вели дека сè уште има предизвици, но и очигледни се заложбите за нивно елиминирање.
За претстојното оценување и колку на далечина тоа ќе биде објективно, министерката напомнува дека има опција да се организира проверка и со физичко присуство под строги протоколи.
„Најголем дел од наставниците, оние кои веќе им предавале во изминатите години на едни исти ученици, тие веќе знаат и препознаваат кој колку се заложува. Предизвиците за оценување се поголеми кај учениците од прво одделение, од шесто одделение и од прва година во средното образование. Сепак, наставникот и ученикот имаат опција да организираат проверка на знаењето со физичко присуство под строги протоколи и така да се дојде до една објективна оценка на знаењето кое ученикот го стекнал. Верувам дека наставниците знаат да препознаат заложба, пораст на заложбите и да дадат стимулација и, согласно со тоа, да ги оценат учениците“,
вели Царовска.
Таа во интервјуто зборува и за исплатата на пари на наставниците за прекувремена работа на оние наставници кои согласно здравствените протоколи минатиот месец работеа со две групи деца од исто одделение. Исплатата по оваа основа, порачува таа, е законски регулирана.
„Исплатата на прекувремените часови е законска обврска, предвидена во Законот за работни односи и таа треба да се почитува. МОН веќе испрати официјален допис до училиштата, односно до училишните раководства да го имаат предвид овој момент. Секој наставник кој работи прекувремено, со две групи, да го добие приходот кој му следува. И, пари за оваа намена има. МОН обезбеди дополнителни средства преку блок-дотациите. Така што, очекувам директорите да направат пресметки колку такви наставници имаат во својот колектив и соодветно да им се исплати прекувремената работа. Лично сметам, но и се залагам дека треба се вреднува трудот на наставниците, бидејќи тие ни се најважната алка во образовниот систем. Само со мотивирани и ангажирани наставници можеме да направиме промени и напредок во образованието и на тоа заеднички ќе работиме во периодот којшто ни претстои“,
вели Царовска.