Според Концепцијата за основно образование која од лани се спроведува етапно, за учениците од второ и од петто одделение оваа учебна година ќе има нови наставни програми. За овие ученици, како и за тие од прво и четврто одделение, учебниците ќе доцнат поради измената на наставните програми кои се во различни фази на одобрување
Околу 255 илјади основци и средношколци задутре ќе ја започнат новата учебна година во отворени училишта и без антиковид-мерки и обврска за носење заштитни маски.
Во изјава за МИА, портпаролот на Комисијата за заразни болести д-р Злате Мехмедовиќ информира дека засега ниту за училиштата, ниту воопшто не се предвидуваат никакви дополнителни превентивни мерки, освен оние што се актуелни и во сила – за болниците, јавниот превоз, аптеките и за домовите за стари лица.
Според Концепцијата за основно образование која од лани се спроведува етапно, за учениците од второ и од петто одделение оваа учебна година ќе има нови наставни програми. За овие ученици, како и за тие од прво и четврто одделение, учебниците ќе доцнат поради измената на наставните програми кои се во различни фази на одобрување.
Сепак, за да се задржи континуитетот на наставата, Министерството за наука (МОН) соопшти дека заедно со Бирото за развој на образованието има подготвено соодветни наставни материјали за овие ученици од кои ќе учат на почетокот на учебната година.
За останатите одделенија, за кои важат старите наставни програми, како и за средното образование, учебниците ќе бидат навреме доставени. Учебниците од четврто и погорните одделенија освен во печатен, ќе бидат достапни и во дигитален формат на порталот e-ucebnici.mon.gov.mk.