Станува збор за некој тип политички контекст, не би сакал јас да го коментирам, одговори денеска министерот порачувајќи дека до последен ден од мандатот, кога и да е тоа, ќе работи онака како што предвидува функцијата и согласно обврските што ги замислиле
Министерот за правда Никола Тупанчески денеска не сакаше да ги коментира информациите дека неговото место во Владата може да го добие Алијанса за Албанците, која е во преговори за влез во владината коалиција.
Денеска изјави дека нема поконкретни информации од тоа што излегува во медиумите, а она што сака да го потенцира е дека до последен ден од мандатот, кога и да е, ќе работи согласно функцијата и онака како што замислил.
„Дефинитивно она што вие го слушате, го слушам и јас. Немам некоја поконкретна информација. Сведоци сме дека има некакви поместувања, дека тоа се во иницијални преговори и разговори итн. Она што сакам да потенцирам и посебно да подвлечам е дека ние како Министерство за правда до последен ден, ако има последен ден од мандатот, ќе ги извршуваме своите функции и своите обврски онака како што сме ги замислиле. Сепак, станува збор за некој вид политички контекст, не би сакал јас да го коментирам“,
рече Тупанчески.
Министерствата за правда и за здравство се двете места за кои во јавноста се шпекулира дека ги мерка Алијанса за Албанците. Од партијата и од Владата, пак, досега немаше официјална потврда дека се разговара за конкретни позиции и кадровски решенија.
Претходно во текот на денот и премиерот и од Алијанса потврдија дека утре ќе се одржи средба помеѓу партискиот лидер Арбен Таравари и премиерот Димитар Ковачевски. Средбата следува откако во петокот во рамките на партијата беше формиран тим за преговори за евентуален влез во Владата.