Можно е евентуално паѓање (одрон на карпата) или излевање и ударен бран од водата
Граѓаните да не се движат под карпата на десниот брег од речното (езерското) корито на Матка. Зоната е ризична и ќе биде обележана, но ќе се ограничи и движењето, соопшти Ценарот за управување со кризи (ЦУК).
Ова е и еден од заклучоците донесени на денешниот работен состанок на ЦУК со претставници на институции, експерти и научни работници од државата, како и со претставници на дел од субјектите на Системот за управување со кризи.
На состанокот е констатирано дека состојбата со карпата на Матка на долг рок е неодржлива- карпата има гранична стабилност поради што е потребно преземање мерки и активности за превенција и намалување на опасноста. Можно е евентуално паѓање (одрон на карпата) или излевање и ударен бран од водата.
ЦУК соопшти дека официјално ќе иницира изготвување проектна програма на дејствување.
„Прво – проектна програма за дејствување; второ – изработка на техничка документација, проект за санација на проблемот и на крајот, како трето – јавна набавка за избор на изведувач на работите за санација на опасната карпа. Во насока за превенција ќе бидат донесени мерки од надлежните за ограничување на движењето во зоната на опасност што не би го попречило работењето на фирмите во околината и движењето на туристите надвор од зоната на ризик“,
информира ЦУК.
Покрај тимот на ЦУК, на состанокот присуствуваа претставници од Државен инспекторат за животна средина, Градежниот факултет, Градежниот институт, Геолошкиот завод, Институтот за земјотресно инженерство и инженерска сеизмологија, Дирекцијата за заштита и спасување, Министерството за внатрешни работи, како и претставник од Комисијата за води и брани при Министерството за животна средина и просторно планирање.
Директорот на ЦУК минатата недела на прес-конференција на која објави информација за опасната карпа, рече дека таа може да остане на истото место уште 100 години, но како институција којашто на прво место ја става безбедноста на граѓаните, тој вели дека се должни да ги известат институциите.