Денеска ЦУК регистрирал и 10 други пожари во државата, од кои седум во Скопско, а останатите три во села на територијата на општините Велес, Демир Хисар и Струмица
Големиот пожар во Богданци, што му се закануваше и на ветерниот парк, е целосно изгаснат, соопштија попладнево од Центарот за управување со кризи (ЦУК).
„Противпожарните тимови се повлекуваат од терен. На лице место е оставена дежурна екипа да внимава да не дојде до повторно разгорување. Изгорени се приближно над 350 хектари нискостеблеста деградирана шума, грмушки и трева. Нема штета на четирите ветерници под кои помина пожарот. Благодарност до храбрите пилоти и пожарникари“,
целат од ЦУК.
Пожарот избувна вчера околу 11 часот веднаш до препумпната станица на хидросистемот Дојранско Езеро во месноста викана Брдаров Камен, а за гаснењето на располагање беа и авионите „ертрактор“ на Дирекцијата за заштита и спасување (ДЗС) и хеликоптерите на МВР.
Покрај овој, на територијата на државата, според евиденцијата на ЦУК, денеска регистрирани се 10 пожари на отворено. Еден во селото Сливник во Општина Велес каде горела куќа, друг во Сопотница, Демир Хисар, со кој била зафатена сува трева и нискостеблести растенија, а стрништа, сува трева и гуми гореле и во струмичко Костурино.
Останатите седум пожари регистрирани денеска биле во Скопско и тоа во: Горно Блаце – горела мешана деградирана шума и трева; селото Љубош, Студеничани над Батинци – горела деградирана шума и дива депонија; Волково – трева, нискостеблеста шума и ѓубре, а изгорел и еден помошен објект; Бојане (Сарај) – шума и трева; Бутел (околу улицата „Боца Иванова кон обиколница) горела сува трева, а изгорел и еден помошен објект; Село Орешани (Зелениково) – горело ѓубре; и депонијата Вардариште.