Освен пакетите со храна, Црвениот крст испраќа и 400 пакети со хигиенски производи до Украина. Ова, како што изјави генералниот секретар на Црвениот крст, Саит Саити, е втора пратка хуманитарна помош за граѓаните во Украина, откако пред неколку дена била пратена помала количина помош. Вредноста на хуманитарната помош која е досега испратена за земјата, додаде тој, е околу 3 290 000 денари
Црвениот крст ги очекува и средствата кои за помош на Украина ги одобрија градските власти, по што се очекува да бидат испратени уште две вакви пратки за Украина
Во организација на македонскиот Црвен крст, вкупно 1 200 пакети со храна и 400 пакети со хигиенски производи ќе бидат испратени до Украина, наменети за лицата на кои помошта во војната им е најпотребна. Камионот со помош наменета за населението од подрачјата погодени од војната во Украина денеска тргнува на пат и се очекува утре или најдоцна задутре да биде предадена на украинскиот Црвен крст.
Пред заминувањето на камионот од Центарот за логистика во Момин Поток, генералниот секретар на Црвениот крст, Саит Саити, изјави дека и порано биле подготвени да ја пратат помошта, но имале проблеми со транспортот.
„Ова е втора пратка хуманитарна помош за граѓаните во Украина. Пред неколку дена беше пратена помала количина помош во збирна пратка, а ова е една комплетна пратка. Претходно беа пратени 400 пакети со хигиена, значи вкупната помош која досега ја праќаме во Украина е 1 200 пакети храна и 800 пакети со хигиена. Вредноста на хуманитарната помош е околу 3 290 000 денари“,
изјави Саити.
Саити рече дека помошта е обезбедена од граѓани, од институции и од резервите на Црвениот крст на Северна Македонија и дека и натаму ќе се мобилизираат за помош и планираат уште една ваква пратка. Црвениот крст ги очекува и средствата кои за помош на Украина ги одобрија градските власти.
„Ги очекуваме и нив и по добивање на тие средства кои се најавени, очекуваме да пратиме уште две вакви пратки за Украина“,
изјави Саити.
Во име на Амбасадата на Украина во земјава, за помошта се заблагодари заменик-амбасадорот, Роман Буга, кој рече дека таа е наменета за семејства погодени од војната кои се внатрешно раселени во Украина, луѓе кои се наоѓаат во опасни зони.
„Тоа се пакети кои може веднаш да се користат и се помош и поддршка за овие семејства. Сета наша досегашната соработка беше многу корисна, имаше делумни пратки кои беа ставени во збирните пратки пратени од Амбасадата на Украина и од Здружението на Украинци во Северна Македонија. Сега го имаме овој цел камион. Се заблагодарувам на Црвениот крст и на целиот народ на Република Северна Македонија за изразената поддршка и помош за украинскиот народ кој во овие тешки времиња страда во војна“,
рече Буга.
Црвениот крст исто така се грижи и за граѓани од Украина кои престојуваат во нашата земја. Саити соопшти дека засега се регистрирани 307 и дека претежно Црвениот крст се грижи за нивните основни потреби – облека, здравствени услуги и изучување јазик. Тој посочи дека засега може со свој потенцијал да се грижат за бегалците од Украина во земјава, а ако се зголеми бројот државата има механизми за организација.
„Ние имаме обезбедено за наредните месеци внатрешни фондови на Црвениот крст од извори на финансирање од Меѓународниот црвен крст. Грижата за нив ќе биде комплетна до крајот на летото со тие средства што ги имаме обезбедено, доколку остане овој број. Воведуваме курсеви по македонски јазик за заинтересирани граѓани од Украина кои престојуваат тука. Досега се пријавени 37 – 20 деца и 17 возрасни и тоа ќе почне утре. За време на летниот одмор планираме и смена за одмор за децата од Украина во нашето одморалиште во Струга“,
информираше Саити.