Оттаму информираат дека почнува подготовката за првична исплата на собраните средства за најитните потреби наменети за настраданите од пожарот
Црвениот крст на Македонија информира дека досега се собрани 43,1 милиони денари за помош на настраданите во пожарот во Кочани и нивните семејства. Вкупниот износ на средства кои се донирани на сметката на Црвениот крст во овој момент изнесува 43 149 360 денари, односно 701 367 евра.
„Упатуваме голема благодарност до сите што донираа и ве информираме дека сме во фаза на подготовка за првична исплата на собраните средства за најитните потреби наменети за настраданите од пожарот во Кочани“,
велат од Црвениот крст на РСМ.
Еден ден по трагедијата во Кочани, Владата објави дека ќе соработува со Црвениот крст на Скопје за управување со официјалната сметка за донации, пред сè за да постои единствена, официјална сметка за донации.
Црвениот крст соопшти дека 165 волонтери вчера учествувале во организацијата на погребите на трагично загинатите. Биле организирани во тимови за прва помош и психолошка поддршка, логистичка поддршка на местата каде што се извршени погребите, како и дека била обезбедена погребна опрема и транспорт за починатите.
„Во контакт сме со партнерските национални друштва од земјите каде се хоспитализирани повредените од пожарот каде им се обезбедува поддршка за семејствата на повредените. Особена поддршка е понудена од организациите на Црвен крст на Србија, Бугарија, Словенија и Грција“,
информираат од Црвениот крст.