Новогодишни пакетчиња за Нова година купиле 56 институции
За украсување на Градот Скопје и уште 15 други општини во земјава за Новата 2021 година се потрошени вкупно 405 илјади евра, што е сепак за 40 отсто помалку од лани. Ова го покажува истражувањето што го спроведе Центарот за граѓански комуникации (ЦГК).
„Од украсување за Новата 2021 година се откажале девет општини кои имале тендери за претходната година. 14 општини имале тендери за украсување и лани и годинава, а 3 општини и едно државно претпријатие немале лани, но имале тендери за Новата 2021 година. За разлика од дочекот на ланската година, кога тендери за украсување имале Градот Скопје и седум скопски општини, за дочекот на оваа година тендери имале Градот Скопје и уште три други скопски општини: Карпош, Гази Баба, Аеродром, но и Градскиот трговски центар“,
се вели во истражувањето.
Украсувањето на Скопје и скопските општини вкупно чинело 298 илјади евра, што е три четвртини од сите пари потрошени за новогодишно украсување во земјава.
И годинава најголем дел од вредноста на договорите за украсување добиле две скопски фирми – „Линк медиа млус“ и „Метал-вет-ел“, а на половина од тендерите имало само по една понуда.
„Новогодишни пакетчиња за 2021 година купиле 56 институции. 14 од нив спровеле тендер, а другите 42 купиле пакетчиња во вредност под илјада евра, за што не се спроведува тендер. Цените на едно новогодишно пакетче се движат од 150 до 1 249 денари“,
се вели во истражувањето.