Сега комисијата од Правда треба да се изјасни за спорните имиња на некои од здруженијата и понатаму да даде позитивно или негативно мислење, по што министерот ќе донесе решение дали тоа здружение ќе треба да се згасне, односно да се избрише или да продолжи со својата работа, информира директорката на Централен регистар
Согласно новите измени на Законот за здруженија и фондации, го доставивме целиот список на здруженија кои се регистрирани во Централниот регистар до Министерството за правда каде што ќе треба комисијата да се изјасни за спорните имиња на некои од здруженијата и понатаму да даде позитивно или негативно мислење, по што министерот за правда ќе донесе решение дали тоа здружение ќе треба да се згасне, односно да се избрише или да продолжи со својата работа, информира директорката на Централен регистар Марија Бошковска Јанковски во емисијата „Студио 10“ на ТВ 24.
Како што рече таа, на списокот испратен до Министерството за правда се наоѓаат 17 000 организации.
„Не зборуваме само за бугарски клубови, сите здруженија кои се во базата на Централниот регистар се на списокот, па комисијата од Министерството за правда нека оцени дали некое здружение треба да престане со својата работа или не, согласно измените во Законот за здруженија и фондации“,
нагласи Бошковска Јанковски.
Статутот и програмите генерално се исти кај сите здруженија, додаде таа, со таа разлика што кај бугарските има некои реченици во смисла дека ќе ги штити бугарските интереси и т.н., но тоа не е доволен момент за да не може да се регистрира тој правен субјект, појасни директорката на Централниот регистар.
„Ние сме само евидентно тело, база на податоци, и ние не можеме да кажеме дали некое здружение може да се регистрира или не. Ако правниот субјект ја поднел цела потребна документација и во пријавата и прилозите потребни за регистрација ги исполнува условите, ние не можеме да му кажеме дали ќе биде регистриран или не. Ние постапуваме исклучиво според законот. Сега, со измените во Законот за здруженија и фондации, ако некое здружение побара да се регистрира, а притоа има спорно име, ние ќе бараме дали тој правен субјект има согласност од Министерството за правда за регистрација“,
објасни Бошковска Јанковски.
Таа повтори дека бугарското здружение „Цар Борис Трети“од Охрид поднело пријава за усогласување со новиот Закон за здруженија и фондации, односно за промена на името, што не е случај и со бугарскиот клуб „Ванчо Михајлов“ од Битола.
„За ‘Цар Борис Трети’ на 10 февруари е поднесено барање, односно еден лист хартија, со допис за усогласување со новиот Закон за здруженија и фондации и не е наведено ништо друго. Тоа не ја задоволува законската процедура за менување на име. Сепак, отворен е деловоден број и информирано е дека треба да постапи согласно Законот – да достави пријава и пропратна документација за да го изврши усогласувањето. Ова можеби на некој начин е купување време, но ако достават пријава, нормално, ќе биде информирано Министерството за правда за конечно да се донесе одлука во врска со името на здружението“,
рече директорката на Централен регистар.
Собранието на почетокот на ноември минатата година ги усвои измените на Законот за здруженија и фондации според кои се забранува граѓански здруженија, фондации и политички партии да користат имиња, прекари, псевдоними кои се поврзани со фашизам, нацизам, геноцид, Третиот рајх и сл.
Законот за здруженија и фондации предвидува дека одобрение за употреба на име, презиме, прекар, псевдоним, кратенка или иницијали на историска личност, дава министерот за правда по претходно добиено позитивно мислење од Комисијата за употреба на имињата на историски личности, а која ја формира самиот министер.
Законските измени имаат и ретроактивно значење, односно предвидуваат дека сите досега формирани организации, здруженија, фондации, сојузи итн., имаат рок од три месеци да го усогласат своето име или назив согласно законските прописи.