Медиумите во Србија објавија и неофицијални бројки дека сплавот бил регистриран за 220 лица, а се претпоставува дека на новогодишната ноќ имало најмалку 400, а можеби дури и 600 луѓе
Две третини од белградскиот сплав „Фристајлер“ денеска е под вода откако почна да тоне за време на новогодишната забава поради пренатрупаност.
Српските медиуми денеска објавуваат нови детали поврзани со локалот, меѓу кои и за цените за дочекот на Новата година. Според информациите на порталот „Нова.рс“, кои ги пренесуваат и други српски медиуми, само влезот за новогодишната ноќ се плаќал 25 евра, а за пијачки се плаќало кој колку ќе испие.
Резервација на маса за пет лица била 300 евра вклучувајќи и едно шише алкохол. ВИП маса за осуммина била 650 евра со едно шише алкохол и еден шампањско, а пакет „ВИП ланч“ за 12 луѓе со шише алкохол и две шишиња шампањско биле 1 300 евра.
Имало и полуксузни резервации, па така за „Дуплекс ВИП ланч“ се плаќало по 1 900 евра (за 15 луѓе со две шишиња алкохол и две шишиња шампањско), а за „Супер ВИП ланч“ гостите плаќале 2 900 евра (за 15 луѓе, но со две шишиња премиум алкохол и два шишиња шампањско „Дом Перињон“).
Градоначалникот на Белград, Александар Шапиќ, во првичната изјава вчера посочи дека според првичните информации причината за потонувањето е што на сплавот имало два до три пати повеќе луѓе од дозволеното. Денеска, медиумите во Србија објавија и неофицијални бројки дека сплавот бил регистриран за 220 лица, а се претпоставува дека на новогодишната ноќ имало најмалку 400, а можеби дури и 600 луѓе.