Од Комората велат дека иако не се знае каква ќе биде жетвата во Русија и Украина и што ќе се случува со производството на жито, но и со војната во Украина и на Блискиот Исток која директно се рефлектира врз цената на нафтата, сепак, потврдуваат дека засега нема да има промени во цената на лебот
Цената на лебот засега е стабилна и така и ќе остане, велат од Агро-бизнис комората при Сојузот на стопански комори (ССК).
Од Комората велат дека иако не се знае каква ќе биде жетвата во Русија и Украина и што ќе се случува со производството на жито, но и со војната во Украина и на Блискиот Исток која директно се рефлектира врз цената на нафтата, сепак, потврдуваат дека засега нема да има промени во цената на лебот.
Горан Ѓорѓиевски од Агро-бизнис комората при Сојузот на стопански комори вели дека бизнисот и натаму стои зад либералниот концепт и оти секогаш понудата и побарувачката треба да ја одредуваат конечната цена.
„Цената на лебот ќе остане иста, стабилна е. Не знаеме што ќе се случува во однос на војната во Украина и на Блискиот Исток која директно се рефлектира на цената на нафтата, не знаеме ниту каква ќе биде жетвата во Русија и Украина и што ќе се случува со производството на жито. Повеќе параметри влијаат на финалната цена, но во овој момент ќе има иста цена на лебот“,
рече Ѓорѓиевски.
Ѓорѓиевски додава дека изминатиот период бизнисите имале малку помош и оти изминатите две години кризата ја износеле на свои плеќи.
„Малку помош имаше бизнисот во изминатиот период за да се овозможи да има некоја соодветна ниска цена. Кризата која траеше две години, бизнисот ја износи на свои плеќи за разлика од регионот каде другите држави имаа сериозна помош – субвенционирана цена на електрична енергија од 80 евра за мегават-час, активирање на стоковните резерви кои дојдоа до бизнисот и овозможија пониски цени. Кај нас не беше така и практично, овозможивме многу ниска цена на производите иако немавме никаква помош и субвенции од страна на државата“,
рече Ѓорѓиевски.
Според претседателот на Сојузот на стопански комори (ССК), Трајан Ангелоски, Законот за забрана на нефер трговски практики и лимитирањето на цените на одредени прехранбени производи се две различни прашања.
Што се однесува до потрошувачката на лебот и цената, Ангелоски, вели дека таа е на речиси исто ниво од пред лимитирањето на цените, а тоа вели дека е така затоа што голем дел од луѓето купуваат и други типови леб, чија цена не е ограничена.
Претседателот на ССК, Ангелоски, смета дека онаму каде што нафтата игра позначајна улога во цените, тоа ќе се одрази на пазарот, но додава и дека таа не е единствениот фактор што се одразува врз цените.
„Тука е цената на работна сила. Луѓето кои произведуваат леб и други прехранбени производи ќе траба да ги платите повеќе, а со тоа автоматски расте и цената на тие производи. Тоа е еден затворен круг. Но, не треба да се фокусираме на тоа колку може цените да бидат ниски, туку колку нашата економија може да порасне. Цените никогаш не може да бидат толку ниски, колку што ќе биде лош резултатот на нашата економија или да бидат толку ниски за да имаме комотен живот. Не постои таква економска логика“,
рече Ангелоски.
Тој додава дека бизнисот мора повеќе да произведува и да остварува повеќе доход, а цените вели дека ќе растат согласно светските случувања, независно дали ќе влијаат нафтата, житото или другите берзански производи.
Ангелоски вели дека се потребни здрави економски политики и здрави реформи, а економијата, вели тој не смее да произведува еден процент раст, туку пет, шест и повеќе.
И Ангелоски и Ѓорѓиевски велат дека земјава по кризата, во овие две години, не презема ниту една реална мерка, а мора да ја намали зависноста од енергенси како нафтата.